غزہ میں اسرائیل اور حماس کے درمیان جنگ بندی کا آغاز ہوگیا، حماس کی جانب سے معاہدے کے تحت 3 اسرائیلی خواتین کو رہا کردیا گیا ہے جس کے بدلے اسرائیلی جیل سے 90 فلسطینی قیدیوں کو بھی رہائی نصیب ہوگئی ہے۔
بین الاقوامی خبر رساں ادارے کی رپورٹ کے مطابق گزشتہ روز فلسطینی مزاحمتی تنظیم حماس نے جنگ بندی معاہدے کے تحت 3 اسرائیلی خواتین قیدیوں کو ریڈ کراس کے حوالے کیا۔
ریڈ کراس کی ٹیم نے رہائی پانے والی اسرائیلی خواتین کو غزہ میں اسرائیل کے خصوصی فوجی یونٹ پہنچایا جہاں سے انہیں فوجی اسپتال منتقل کیا گیا۔
حماس کی جانب سے رہائی کے موقع پر تینوں اسرائیلی خواتین کو یادگاری تحفے میں ایک بیگ دیا گیا۔
جاری کی گئی ویڈیو میں دیکھا گیا ہے کہ اسرائیلی خواتین جیسے ہی رہائی پانے کے بعد گاڑی میں بیٹھیں تو حماس کے اہلکاروں کی جانب سے انہیں بظاہر بھورے رنگ کا ایک کاغذ کا بیگ تحفے میں دیا جاتا ہے۔
رپورٹس کے مطابق اس بیگ میں حماس نے اسرائیلی خواتین کو تحفے میں گریجویشن کی سند، عربی زبان کے سرٹیفکیٹ، فلسطین کا نقشہ اور قید کے دوران کی ان کی تصاویر دیں۔
اس سے قبل حماس کی قید سے جنگ بندی معاہدے کے تحت رہائی پانے والی اسرائیلی خواتین کی اہلخانہ سے ملاقات کی ویڈیو بھی وائرل ہوگئی۔
اسرائیلی میڈیا کی جانب سے قیدیوں کے تبادلے کے مناظر بڑی اسکرینوں پر براہ راست دکھائے گئے۔
اسرائیلی میڈیا نے حماس سے رہائی پانیوالی خواتین قیدیوں کی ملاقات کی ویڈیو بھی سوشل میڈیا پر وائرل کردی ہے، جس میں دیکھا جا سکتا ہے جس میں قیدیوں کے اہلخانہ کو اپنے پیاروں سے گلے مل کر ملاقات کرتے ہوئے دکھایا گیا ہے۔
