غزہ: حماس کے مسلح ونگ نے کہا ہے کہ نیتن یاہو معاہدے کی بجائے غزہ میں اسرائیلی فوجی حملوں پر انحصار کر رہے ہیں، اس کا مطلب ہے کہ مزید قیدیوں کو ’’تابوتوں میں ان کے اہل خانہ کو واپس کیا جائے گا۔‘‘
الجزیرہ کے مطابق حماس کے مسلح ونگ نے کہا ہے کہ اس نے قیدیوں کو سنبھالنے والے محافظوں کو نئی ہدایات جاری کی ہیں، اور ایک بیان میں کہا ہے کہ اگر اسرائیلی فوجی حملے جاری رہے تو غزہ میں قید اسرائیلیوں کو تابوتوں میں اسرائیل واپس بھیج دیا جائے گا۔
حماس نے پہلی بار یرغمالیوں کے حوالے سے اسرائیل کو خبردار کیا ہے کہ قیدیوں کی نگرانی پر مامور محافظوں کو ’نئی ہدایات‘ دی گئی ہیں کہ اگر اسرائیلی فوجی قریب آئیں تو انھیں کیا کرنا ہے۔
القسام بریگیڈز کے ترجمان ابو عبیدہ نے 6 قیدیوں کی لاشیں برآمد ہونے کے بعد پیر کو اپنے بیان میں کہا ’’قیدیوں کے اہل خانہ کو انھیں مردہ یا زندہ وصول کرنے میں سے کسی ایک کا انتخاب کرنا ہے۔‘‘ انھوں نے کہا نیتن یاہو اور فوج ان قیدیوں کی موت کے لیے مکمل طور پر ذمہ دار ہیں کیوں کہ انھوں نے قیدیوں کے تبادلے کے معاہدے میں جان بوجھ کر رکاوٹ ڈالی تھی۔
القسام بریگیڈز کی جانب سے یہ بیان نیتن یاہو کے اس بیان کے فوراً بعد سامنے آیا ہے جس میں انھوں نے کہا تھا کہ جن چھ اسیروں کی لاشیں غزہ کے جنوبی علاقے رفح میں ایک سرنگ سے برآمد ہوئی تھیں، انھیں حماس نے ’’موت کے گھاٹ‘‘ اتارا تھا۔ نیتن یاہو کے اسرائیلی شہریوں کے زبردست احتجاج کے آگے مجبور ہو کر پہلی بار پیر کو ٹی وی پر معافی مانگی کہ وہ قیدیوں کو زندہ نہ لا سکے، حماس کو اس کی بہت بھاری قیمت چکانی پڑے گی۔ دوسری طرف حماس کے سینیئر اہلکار عزت الرشیق نے بتایا کہ 6 اسیران اسرائیلی فضائی حملوں میں مارے گئے تھے۔
واضح رہے کہ ہزاروں اسرائیلی نیتن یاہو کی حکومت کے خلاف مظاہرے کر رہے ہیں، ان کا مطالبہ ہے کہ جنگ بندی معاہدہ کر کے غزہ میں قید اسرائیلیوں کو جلد سے جلد رہا کروایا جائے، تاہم وزیر اعظم نیتن یاہو نے ایک بار پھر کہا ہے کہ وہ ’’دباؤ کے سامنے نہیں جھکیں گے۔‘‘ اسرائیلی وزیر اعظم کو امریکی صدر جو بائیڈن کے نئے دباؤ کا بھی سامنا ہے۔ نیتن یاہو بہ ضد ہیں کہ مصر کے ساتھ غزہ کی ایک تنگ پٹی فلاڈیلفی کوریڈور کا کنٹرول جنگ بندی کے کسی بھی معاہدے کا لازمی حصہ ہوگا، جب کہ حماس کا کہنا ہے کہ غزہ سے تمام اسرائیلی افواج کے مکمل انخلا سے ہی معاہدہ طے پا سکتا ہے۔
