کراچی: پاکستانی اداکارہ حرا مانی نے شوٹنگ کے دوران بچوں کا وقت ضائع ہونے پر آواز بلند کرتے ہوئے متعلقہ افراد اور والدین سے اہم مطالبہ کردیا۔
سماجی رابطے کی ویب سائٹ پر انہوں نے اپنے ساتھ پیش آنے والے واقعے کو شیئر کیا اور لکھا کہ ’’بہترین پرورش اور اہمیت بچوں کا بنیادی حق ہے‘‘۔ اداکارہ نے لکھا کہ ’’ویسے تو ہم ہر بات شیئر کرتے ہیں تو میں نے سوچا کہ آپ کے ساتھ یہ بات بھی شیئر کروں ، ممکن ہے کہ میری بات متعلقہ افراد تک پہنچ جائے‘‘۔
انہوں نے لکھا کہ کچھ دنوں پہلے میں ایک شوٹ پر تھی جہاں دو بچے بھی اپنا سین ریکارڈ کرانے آئے ہوئے تھے، انتظامی غفلت اور لاپرواہی کی وجہ سے اُن بچوں کو 8 گھنٹے تک انتظار کرنا پڑا۔
حرا مانی نے لکھا کہ ’’اپنے سر سے بوجھ اتارنے کے لیے بچوں کو سیٹ پر جلدی بلوایا جاتا ہے، اس بات پر مجھے بہت غصہ آتا ہے کیونکہ آپ ان آرٹسٹ بچوں کو اپنے بچوں کی طرح نہیں سمجھتے‘‘۔
اداکارہ نے لکھا کہ ’’عام طور پر بچوں کے سین کم (مختصر دورانیے کے) ہوتے ہیں اس لیے اُن کی ریکارڈنگ پہلے کر لینا چاہیے، اگر ایسا ہو جائے تو وہ بخوشی اچھا کام کریں گے‘‘۔
حرا نے درخواست کی کہ وہ والدین جو اپنے بچوں کو شوٹ پر لاتے ہیں اُن کاٹائمنگ اور کھانے پینے کے حوالے سے بہت خیال رکھا کریں کیونکہ جب تک ہم اپنے بچوں کو اہمیت نہیں دیں گے تب تک دوسرا بھی اس بات کا خیال نہیں رکھے گا۔
