آپ نے جانوروں کی آپس میں محبت و دوستی کی بے شمار کہانیاں سنی ہوں گی، لیکن امریکا کے اس گھوڑے کا عمل نہایت منفرد ہے جو خود قید ہونے کے باوجود ننھے پرندوں کا خیال رکھتا ہے۔
امریکی شہر نیویارک کے ٹرمپ ٹاور کے باہر کسی سیاح نے ایک ویڈیو ریکارڈ کی جس میں ایک گھوڑا اپنے آس پاس بیٹھے پرندوں کو دانہ چگنے میں مدد دے رہا ہے۔
ان کبوتروں کے کھانے کے لیے ایک برتن میں دانہ موجود تو ہے لیکن وہ بہت گہرا ہے اور کبوتروں کے لیے اس میں اترنا ذرا مشکل ہے۔
ان کے قریب کھڑے تانگے میں جتے گھوڑے نے ان کی مدد کی اور برتن میں منہ ڈال کر دانہ نکال کر کبوتروں کے آگے ڈھیر کردیا۔
کبوتر گھوڑے کی اس مدد سے نہایت خوش ہوئے اور پھدک پھدک کر دانہ چگنے میں مگن ہوگئے۔
