پاکستان تحریک انصاف کے رہنما اور سابق رکن قومی اسمبلی ہمایوں اختر خان نے 9 مئی کے پُرتشدد واقعات پر پارٹی چھوڑنے کا اعلان کر دیا۔
ہمایوں اختر خان نے اپنے جاری کردہ بیان میں کہا کہ ان حالات میں پی ٹی آئی کے ساتھ تعلق قائم رکھنا ممکن نہیں رہا، شہدا کا لہو اور قربانیاں یہ قوم کبھی فراموش نہیں کرے گی۔
سابق رکن قومی اسمبلی نے کہا کہ 9 مئی کے پُرتشدد واقعات نے قوم کی طرح ہمارے خاندان کو بھی افسردہ کیا، پاکستانی قوم نے ہمیشہ پاک افواج کا بہت احترام کیا ہے۔
پی ٹی آئی رہنما ہمایوں اختر خان کا پارٹی چھوڑنے کا اعلان#ARYNews #PTI pic.twitter.com/nbdNDZSE8m
— ARY NEWS (@ARYNEWSOFFICIAL) June 22, 2023
اس سے قبل سابق وفاقی وزیر ہوا بازی غلام سرور خان نے 9 مئی کے واقعات کی مذمت کرتے ہوئے پی ٹی آئی سے علیحدگی کا اعلان کیا۔
غلام سرور خان کا کہنا تھا کہ جو کچھ ہوا بہت بُرا ہوا، جن لوگوں نے اداروں کے ساتھ محاذ آرائی کی اس کی مذمت کرتا ہوں، پارٹی میں رہ کر بھی محاذ آرائی کی پالیسی سے ہر فورم پر اختلاف کرتا رہا۔
ان کا کہنا تھا کہ کور کمانڈر ہاؤس اور شہدا کی یادگاروں پر حملہ آور ملک دشمنی کے مرتکب ہوئے، انہوں نے کور کمانڈر ہاؤس پر نہیں بلکہ پاکستان کے دل پر حملہ کیا، ان واقعات میں ملوث لوگوں کو قرار واقعی سزا دینی چاہیے۔
واضح رہے کہ غلام سرور خان کو گزشتہ روز اسلام آباد کے علاقے ایف 8 میں دوست کے گھر سے گرفتار کیا گیا تھا۔
پولیس حکام نے ان کی گرفتاری کی تصدیق کرتے ہوئے کہا تھا کہ گرفتار شدگان میں غلام سرور کے بیٹے منصور حیات اور بھتیجے عمار صدیق بھی شامل ہیں، تینوں سانحہ 9 مئی میں جلاؤ گھیراؤ اور جوڈیشل کمپلیکس پر حملے میں مطلوب تھے۔