اسلام آباد : اسلام آباد ہائیکورٹ نے بانی پی ٹی آئی کے ملٹری ٹرائل کے حوالے سے وفاقی حکومت سے سولہ ستمبر تک وضاحت طلب کرلی۔
تفصیلات کے مطابق اسلام آباد ہائی کورٹ میں بانی پی ٹی آئی کی ممکنہ ملٹری حراست اور ٹرائل روکنے کی درخواست پرسماعت ہوئی، جسٹس میاں گل حسن اورنگزیب درخواست پر اعتراضات کے ساتھ سماعت کی۔
کمرہ عدالت میں موجود اسسٹنٹ اٹارنی جنرل عظمت بشیر تارڑ روسٹرم پر طلب کیا، جسٹس میاں گل حسن اورنگزیب نے کہا اٹارنی جنرل آفس سے ہدایات لے کر عدالت کو آگاہ کیا جائے آپ کہہ رہے ہیں کہ کوئی کیس نہیں لیکن آگے ہو سکتا ہے؟
جسٹس گل حسن اورنگزیب نے ریمارکس دیے کہ وزرا کی طرف سےبانی پی ٹی آئی کےملٹری ٹرائل کی دھمکی دی گئی، بانی پی ٹی آئی سویلین ہیں،سویلین کاملٹری ٹرائل درخواست گزار اور عدالت کیلئے باعث فکر ہے،سپریم کورٹ کا فوجی عدالتوں میں سویلین کے ٹرائل سے متعلق فیصلہ موجودہے۔
اسلام آباد کے جج نے کہا کہ جواب دیں کیا بانی پی ٹی آئی کے ملٹری ٹرائل کا معاملہ زیرغور ہے؟اگر ایسا کچھ نہ ہوا تودرخواست غیرموثر ہو جائے گی،اور اگر ایسا کچھ ہوا تو کیس سن کر فیصلہ کریں گے ۔
بانی پی ٹی آئی کے وکیل عزیر بھنڈاری نے کہا کہ ہمیں خدشہ ہے،بیان آیا ہے، حکومتی اعلیٰ عہدیداروں کی طرف سے بھی بیانات دیے گئے، جس پر جسٹس میاں گل حسن اورنگزیب نے ریمارکس دیے کہ یہ سیاست ہے وہ بھی سیاست ہے، اگر ایسا ہے تو فیڈریشن سے واضح موقف آناچاہیے، آج ہم کہہ دیں کہ ابھی کچھ نہیں ہے،کل آپ ملٹری ٹرائل کا آرڈر لےآئیں پھرکیاہوگا؟
اسلام آباد ہائیکورٹ نے بانی پی ٹی آئی کے ملٹری ٹرائل کے حوالے سے وفاقی حکومت سے سولہ ستمبر تک وضاحت طلب کرلی اور اسسٹنٹ اٹارنی جنرل کو وفاقی حکومت سے ہدایات لے کر پیر کو عدالت کو واضح طور آگاہ کرنے کا حکم دے دیا
اسلام آباد ہائیکورٹ نے بانی پی ٹی آئی کی درخواست پر اعتراضات دور کر دیے اور جسٹس میاں گل حسن اورنگزیب نے رجسٹرار آفس کو درخواست پر نمبر لگانے کی ہدایت کرتے ہوئے سماعت سولہ ستمبر تک ملتوی کر دی۔
