اسلام آباد: آئی ایم ایف نے پٹرولیم ڈیولپمنٹ لیوی کے تحت اقدامات کے جائزے کا فیصلہ کیا ہے۔
ذرائع پٹرولیم ڈویژن کے مطابق آئی ایم ایف ٹیم نے پٹرولیم ڈویژن حکام سے ملاقات کی درخواست کی تھی، جس پر یہ ملاقات 30 نومبر کو طے کر لی گئی ہے۔
ذرائع نے بتایا کہ اس ملاقات میں پٹرولیم لیوی اور پٹرولیم ڈویژن سے متعلقہ دیگر ریونیو اقدامات پر غور ہوگا۔
جولائی تا ستمبر 2023 سالانہ بنیاد پر پٹرولیم لیوی کی وصولی میں 368 فی صد اضافہ ہوا، وفاق نے رواں مالی سال کی پہلی سہ ماہی لیوی کی مد میں 222 ارب روپے وصول کیے، گزشتہ سال جولائی تا ستمبر لیوی کی مد میں وصولی 47 ارب 48 کروڑ روپے تھی۔
ذرائع کے مطابق رواں مالی سال کے لیے پٹرولیم لیوی کی وصولی کا ہدف 869 ارب روپے مقرر ہے، جب کہ گزشتہ سال پٹرولیم لیوی کی مد میں 580 ارب روپے وصول کیے گئے تھے۔
اس وقت فی لیٹر پٹرول پر 60 روپے لیوی وصول کی جا رہی ہے، جب کہ ہائی اسپیڈ ڈیزل فی لیٹر پر بھی 60 روپے کے حساب سے لیوی عائد ہے۔
