پاکستان تحریک انصاف کے چیئرمین اور سابق وزیراعظم عمران خان نے جلد سندھ کے تمام اضلاع کے دورے کرنے کا اعلان کیا ہے۔
اے آر وائی نیوز کے مطابق سابق وزیراعظم عمران خان سے پی ٹی آئی سندھ کے صدر علی زیدی نے وفد کے ہمراہ زمان پارک لاہور میں ملاقات کی جس میں سندھ کی سیاسی صورتحال پر تبادلہ خیال کیا گیا۔ ملاقات کرنے والے وفد میں سابق وزرائے اعلیٰ غوث علی شاہ اور لیاقت جتوئی بھی شامل تھے۔
اس موقع پر پی ٹی آئی چیئرمین نے سینیئر سیاستدانوں لیاقت جتوئی اور سید غوث علی شاہ کو پارٹی کی سینٹرل ایگزیکٹو کمیٹی کا رکن بنانے کا فیصلہ کیا ساتھ ہی صوبائی صدر علی زیدی کو عام انتخابات کی تیاری اور سندھ کے لیے پارلیمانی بورڈ تشکیل دینے کی ہدایات کیں۔
عمران خان نے جلد سندھ کے تمام اضلاع کا دورہ کرنے کا اعلان کرتے ہوئے کہا کہ سندھ کے عوام امپورٹڈ حکومت اور زرداری مافیا سے نجات چاہتے ہیں۔ پ ٹی آئی سندھ کی قیادت زرداری مافیا کے خلاف جہاد کر رہی ہے اور ووٹ کی طاقت سے اس مافیا کو شکست دیں گے۔
سابق وزیراعظم کا یہ بھی کہنا تھا کہ جیل بھرو تحریک ملک میں انقلاب کا آغاز ہے۔