بھارت میں بیرون ملک سے آنے والے دو مسافروں کے پیٹ سے ڈیڑھ کلو سے زائد سونا برآمد کیا گیا ہے جس کی مالیت ایک کروڑ بھارتی روپے سے زائد (پاکستانی 3 کروڑ سے زائد) ہے۔
بھارتی میڈیا کے مطابق گزشتہ پیر کی شب بیرون ملک سے راجیو گاندھی انٹرنیشنل ایئرپورٹ حیدرآباد آنے والی فلائٹ کے دو مسافروں کے پیٹ سے 1700 گرام سے زائد سونا برآمد ہوا جو انہوں نے کیپسولوں میں بھر کر پیٹ کی بڑی آنت میں چھپایا ہوا تھا۔
ایئرپورٹ حکام نے دونوں کو گرفتار کرکے سونا قبضے میں لیے لیا جس کی مالیت بھارتی ایک کروڑ روپے سے زائد (پاکستانی تین کروڑ سے زائد) بتائی جاتی ہے۔
رپورٹ کے مطابق محکمہ کسٹم کے ایئر انٹیلی جنس یونٹ (اے آئی یو) کے مطابق دونوں مسافروں کو مخصوص معلومات ملنے کے بعد شک پڑنے پر چیک کیا تو تلاشی کے دوران ان سے 1700 گرام سے زائد سونا برآمد ہوا۔
کسٹم حکام کے مطابق مسافروں نے یہ سونا 6 کیسپولوں میں بھر کر اور ان کے اوپر کالی ٹیپ چڑھا کر اپنی بڑی آنت میں چُھپا رکھا تھا۔ دونوں مسافروں کو انڈین کسٹمز ایکٹ 1962 کے تحت گرفتار کرکے ان سے مزید تفتیش شروع کر دی گئی ہے۔
