سابق بھارتی فاسٹ بولر عرفان پٹھان سمجھتے ہیں کہ بھارت کو ورلڈکپ فائنل میں بہتر منصوبہ بندی کرنے والی ٹیم کے ہاتھوں شکست ہوئی۔
آئی سی سی عالمی کپ کے فائنل میں ایک لاکھ 30 ہزار سے زائد شائقین کرکٹ کے سامنے بھارت کو ان کے ہوم گراؤنڈ پر آسٹریلیا نے عبرتناک شکست دی تھی۔ اس ہار کے بعد سابق کرکٹر محمد کیف نے آسٹریلین ٹیم کے حوالے سے عجیب و غریب بیان دیا تھا۔
کیف کا کہنا تھا کہ میں آسٹریلیا کو چیمپئن نہیں مانتا بھارتی ٹیم نے پورے ٹورنامنٹ میں بہترین کارکردگی دکھائی وہی چیمپئنز ہیں۔ اب کمنٹیٹر عرفان پٹھان نے آسٹریلیا کی شاندار منصوبہ بندی کی تعریف کرتے ہوئے کہا ہے کہ بھارت ایک بہترین گیم پلان بنانے والی ٹیم کے سامنے ڈھیر ہوگیا۔
انھوں نے کہا کہ میرے خیال میں بہتر منصوبہ بندی کرنے والی ٹیم نے بھارت کو شکست دی، آسٹریلیا کی ٹیم نے بہتر منصوبہ بندی کی ہوئی تھی۔ انھوں نے ٹاس کے آغاز سے ہی پلیننگ کی ہوئی تھی۔
عرفان پٹھان کا کہنا تھا کہ مجھے نہیں لگتا کہ جو منصوبہ بندی کینگروز نے کی کوئی اور ٹیم اس قسم کی منصوبہ بندی کے قریب بھی آسکتی ہے۔
سابق کرکٹر نے کہا کہ بھارتی ٹیم جڈیجا، سوریہ کمار اور کے ایل راہل آؤٹ کے آؤٹ ہونے کے بعد پیچھے چلی گئی۔ اس دوران ٹریوس ہیڈ جیسے پلیئرز نے بھی دو اوورز کرائے اور اہم وکٹیں حاصل کیں۔
واضح رہے کہ بھارت کو ون ڈے ورلڈ کپ کے فائنل میں آسٹریلیا کے خلاف دوسری شکست کا سامنا کرنا پڑا ہے جبکہ میزبان نے تیسری بار ٹائٹل حاصل کرنے کا موقع گنوایا ہے۔
