نئی دہلی: بھارتی وزارتِ خارجہ نے پاک بھارت وزرائے خارجہ کے درمیان جنرل اسمبلی اجلاس کے موقع پر ملاقات کی تجویز قبول کر لی، پاک بھارت وزرائے خارجہ ملاقات 27 ستمبر کو ہوگی۔
تفصیلات کے مطابق ذرائع نے کہا ہے کہ شاہ محمود قریشی اور سشما سوراج کے مابین ملاقات 27 ستمبر کو ہوگی، یہ ملاقات پاکستان کی خواہش پر ہو رہی ہے۔
ذرائع کا کہنا ہے کہ اقوامِ متحدہ کی جنرل اسمبلی کے اجلاس کے موقع پر دونوں وزرائے خارجہ کی ملاقات نیویارک میں کھانے کے دوران ہوگی۔ ملاقات سے پاک بھارت مذاکرات کا سلسلہ دوبارہ شروع ہونے کا امکان ہے۔
خیال رہے کہ وزیرِ اعظم عمران خان نے بھارتی وزیرِ اعظم نریندر مودی کو خط لکھ کر کہا تھا کہ دونوں ممالک کے وزرائے خارجہ کو بات چیت کا آغاز کرنا چاہیے اور دونوں یو این جنرل اسمبلی کے اجلاس کے موقع پر ملاقات کریں۔
یہ بھی پڑھیں: وزیراعظم عمران خان کا بھارتی ہم منصب کوخط‘ بھارتی میڈیا کا دعویٰ
بھارتی میڈیا کے مطابق خط میں وزیرِ اعظم عمران خان نے وزیرِ خارجہ شاہ محمود قریشی کی بھارتی وزیرِ خارجہ سشما سوراج سے ملاقات پر زور دیا۔
یہ بھی مدِ نظر رہے کہ رواں ماہ پاکستان اور بھارت کے وزرائے خارجہ اقوام متحدہ کے جنرل اسمبلی اجلاس میں شرکت کریں گے۔
