پاک بھارت جنگ میں 21 ستمبر 1965 وہ دن ہے جب ٹائمز کے نمائندہ خصوصی نے کہا کہ سیالکوٹ میں ٹینکوں کی بڑی لڑائی میں پاکستان نے فیصلہ کن فتح حاصل کی۔
صدر ایوب نے بہترین جنگی کارکردگی پر میجر جنرل ابرار حسین اور بریگیڈیئر عبدالعلی کو بہادری کے 42 ایوارڈ دیے، بریگیڈیئر امجد علی کو بہادری کے دوسرے بڑے ایوارڈ سمیت جرأت کے 42 ایوارڈ دیے، اسکوارڈن لیڈر خاں نیب احمد کو ستارہ جرأت سے نوازا گیا۔
پاکستانی فوج نے سیالکوٹ، کھیم کرن اور حسینی والا سیکٹر میں اہم کامیابیاں حاصل کیں، سیالکوٹ کے محاذ پر پاک فوج نے دشمن کے 6 ٹینک تباہ کیے اور دشمن کو بھاری جانی نقصان پہنچایا۔
پاک فوج نے فاضلکا سیکٹر میں دشمن کے 11 ٹینک، 6 مشین گن اور بہت سا گولہ بارود قبضے میں لیا اور دشمن کی 3 اینٹی ٹینک گنیں تباہ کر دیں، راجستھان سیکٹر میں بھارتی فوج نے داہ میں پیش قدمی کرنے کی کوشش کی، تو پاکستانی فوج نے انھیں مار بھگایا اور دشمن کے بہت سے جنگی ساز و سامان سمیت کچھ علاقہ بھی اپنے قبضہ میں لے لیا۔
پاک فضائیہ نے سرگودھا میں بھارتی جنگی طیارہ کینبرا اور لاہور میں ایک ہنٹر مار گرایا، پاک فضائیہ نے بھارتی علاقوں آدم پور، ہلواڑہ اور جودھپور کے ہوائی اڈوں اور تنصیبات کو بھی شدید نقصان پہنچایا، پاکستان نیوی بھارتی جارحیت کا مقابلہ کرنے اور اپنی سمندری حدود کی حفاظت میں پوری طرح چوکس رہی۔
