کراچی : پاکستان ٹیلی وژن کے معروف لیجنڈری اداکار جمال شاہ نے انڈسٹری سے چار سال کے عرصے کے بعد اے آر وائی کے ڈرامے ’تیرے عشق کے نام ‘ میں کردار ادا کرنے کی اہم وجہ بیان کردی۔
اداکار جمال شاہ نہ صرف ایک بہترین اداکار ہیں بلکہ ڈائریکٹر، پینٹر، مجسمہ ساز اور سوشل ورکر بھی ہیں، گزشتہ برس اداکار جمال شاہ کو ان کی بہترین کارکردگی کی اعتراف میں فرانس کے ممتاز ایوارڈ نائٹ آف دی آرڈر آف آرٹس اینڈ لیٹرز” سے بھی نوازا گیا۔
اداکار جمال شاہ نے اے آر وائی نیوز کے پروگرام باخبر سویرا میں خصوصی شرکت کی جس میں انہوں نے اپنے شاندار ماضی اور ملک کیلیے اپنی خدمات کے حوالے سے ناظرین کو آگاہ کیا۔
انہوں نے بتایا کہ میں حادثاتی طور پر اداکار بنا ویسے میں بنیادی طور پر ایک پینٹر ہوں اپنے ماضی کے حوالے سے بتاتے ہوئے انہوں نے کہا کہ بھٹو کے دور میں محکمہ پولیس میں بھرتیاں آئیں تو میں نے اپنے والد سے وہاں نوکری کیلئے مشورہ کیا تو میرے والد جو خود ایک ریٹائرڈ پولیس آفیسر تھے انہوں نے صاف منع کردیا کہ کچھ بھی کرلو لیکن پولیس میں کبھی مت جانا۔
شوبز انڈسٹری میں واپسی کے حوالے سے ایک سوال کے جواب میں جمال شاہ نے کہا کہ چار سال کے طویل وقفے کے بعد دوبارہ ایک ٹی وی ڈرامے’تیرے عشق کے نام ‘میں کام کرنے کی حامی بھری ہے جو اے آر وائی سے آن ایئر ہوگا۔
انہوں نے بتایا کہ تقریباً 35 اسکرپٹس مسترد کرنے کے بعد مجھے اے آر وائی کے اس ڈرامے کا اسکرپٹ بہت اچھا لگا جو میرے مزاج اور میری پسند کے عین مطابق ہے، میں نے جتنے بھی اسکرپٹس پڑھے ان سب میں یہ بات نہیں تھی جو اس میں ہے کیونکہ اس ڈرامے میں معاشرے کی سچائی کی عکاسی کی گئی ہے جو حقیقت سے بہت قریب تر ہے۔
