نئی دہلی: بھارتی کرکٹ ٹیم کے تجربہ کار فاسٹ بولر جسپریت بمراہ نے اہم سنگ میل عبور کرلیا۔
بھارتی میڈیا کے مطابق چنئی کے ایم اے چدمبرم اسٹیڈیم میں بھارت اور بنگلہ دیش کے درمیان کھیلے جا رہے دو ٹیسٹ میچوں کی سیریز کے پہلے میچ میں فاسٹ بولر نے اہم کارنامہ انجام دیدیا۔
بمراہ نے اپنی 400 بین الاقوامی وکٹیں مکمل کر لی ہیں۔ وہ 400 وکٹیں لینے والے ہندوستان کے 10ویں بولر بن گئے ہیں۔ اس کے ساتھ ہی انہوں نے کم میچوں اور اننگز میں 400 وکٹیں لینے والے پانچویں ہندوستانی بولر کا اعزاز بھی حاصل کرلیا ہے۔
بھارت کے لیے فاسٹ باؤلر نے ٹیسٹ کرکٹ میں 20.48 کی اوسط سے مجموعی طور پر 162 وکٹیں حاصل کی ہیں، جب کہ ون ڈے کرکٹ میں انہوں نے 23.55 کی اوسط سے 149 وکٹیں حاصل کی ہیں۔
ٹی 20 کرکٹ میں 17.75 کی اوسط سے 89 وکٹیں حاصل کی ہیں، فاسٹ بولر نے 196 بین الاقوامی میچوں کی 227 اننگز میں مجموعی طور پر 400 وکٹیں حاصل کرلی ہیں، بہترین کارکردگی کی اگر بات کی جائے 19 رنز کے عوض 6 وکٹیں حاصل کی ہیں۔
واضح رہے کہ بھارت کے اشون 400 بین الاقوامی وکٹیں مکمل کرنے والے ہندوستان کے پہلے بولر ہیں۔ اشون نے 216 اننگز میں 400 بین الاقوامی وکٹیں حاصل کی ہیں۔
ان کے بعد کپل دیو دوسرے نمبر پر براجمان ہیں جنہوں نے کل 220 اننگز میں یہ کارنامہ انجام دیا تھا۔ تیسرے ہندوستانی محمد شامی ہیں جنہوں نے 224 اننگز میں 400 وکٹیں حاصل کیں۔
بابر اعظم نے ویرات کوہلی کا ریکارڈ توڑ دیا
انیل کمبلے 226 اننگز میں 400 بین الاقوامی وکٹیں لینے والے چوتھے ہندوستانی بولر ہیں۔ اب جسپریت بمراہ سب سے کم میچوں اور اننگز میں 400 بین الاقوامی وکٹیں لینے والے پانچویں ہندوستانی بولر بن گئے ہیں۔
