اسلام آباد : نون لیگی رہنما جاوید لطیف نے سندھ میں بھی حکومت بنانے کا دعویٰ کرتے ہوئے کہا کہ 2018 سے پہلے کا دور واپس آرہا ہے، پنجاب تو کیا اس بار سندھ میں بھی حکومت بنائیں گے۔
تفصیلات کے مطابق مسلم لیگ ن کے رہنما جاوید لطیف نے پریس کانفرنس کرتے ہوئے کہا کہ 9 مئی کو شرپسندوں نے ریاستی اداروں کو نشانہ بنایا، 9 مئی واقعات میں ملوث افراد سے رعایت نہیں برتی جاسکتی۔
جاوید لطیف کا کہنا تھا کہ چیئرمین پی ٹی آئی کی منصوبہ سازی بری طرح ناکام ہوئی، ریاستی اداروں پرحملہ براہ راست ریاست پرحملہ ہے، سابقہ دور حکومت میں سازش کےتحت سی پیک روکا گیا اور سی پیک لانے والے کیساتھ جو سلوک ہوا وہ سب نے دیکھا۔
ن لیگی رہنما نے کہا کہ تین بار وزیراعظم رہنے والے نواز شریف سے لوگوں کو امید ہے، نواز شریف انتخابی مہم کیلئے نہیں انتخابی تحریک کیلئے آرہا ہے، نواز شریف آئے گا پھر سے خوشحالی لائے گا۔
ان کا مزید کہنا تھا کہ الیکشن کا مطلب صرف ووٹ ڈالنا نہیں ہوتا بلکہ ووٹ کو عزت دینا بھی ہے، امید ہے نواز شریف کے آنے سے 2017 والا پاکستان واپس ملے گا۔
جاوید لطیف نے دعویٰ کیا کہ ہم پنجاب توکیااس بارسندھ میں بھی حکومت بنائیں گے، دو صوبوں میں ہماری حکومت ہوگی باقی دو صوبوں میں اتحادی ہوں گے۔
