بالی ووڈ فلم ’جوان‘ کی بلاک بسٹر کامیابی پر کنگ خان نے دنیا بھر میں اپنے مداحوں کا شکریہ ادا کیا ہے۔
اداکار شاہ رخ خان کی ریلیز ہونے والی نئی فلم ’جوان‘ نے پہلے ہی دن سے کامیابی کے جھنڈے گاڑنا شروع کر دیے، اوپننگ ڈے پر 75 کروڑ روپے کما کر ریکارڈ بنا لیا ہے جب کہ انٹرنیشنل سینما میں کمائی 130 کروڑ تک پہنچ گئی ہے۔
اس کامیابی پر شاہ رخ نے سماجی رابطوں کی ویب سائٹ ایکس پر مداحوں کا شکریہ ادا کرتے ہوئے ایک ٹوئٹ میں لکھا ’’جوان کے لیے تمام محبتوں اور تعریفوں کا شکریہ، سلامت اور خوش رہیں۔‘‘
Thank you for all the love and appreciation for #Jawan!! Stay safe and happy… Please keep sending in the pics and videos of all of you enjoying at the movies…. And I will be back soon to see all of them! Until then… Party with Jawan in the theatres!! Lots of love and…
— Shah Rukh Khan (@iamsrk) September 8, 2023
بالی ووڈ کنگ نے مداحوں سے یہ بھی کہا کہ وہ فلمیں دیکھتے ہوئے اپنی تصاویر اور ویڈیوز بھیجتے رہیں، میں جلد ہی انھیں دیکھنے لوٹوں گا، تب تک جوان کے ساتھ تھیٹرز میں پارٹی کا لطف لیں۔
انڈین ایکسپریس کے مطابق ڈائریکٹر ایٹلی اور شاہ رخ کی فلم جوان نے ہندی سنیما کی تاریخ میں اب تک کی سب سے بڑی اوپننگ کا ریکارڈ توڑ دیا ہے، جوان نے دوسرے دن 53 کروڑ روپے کمائے، جو شاہ رخ کی پچھلی فلم پٹھان کے پہلے دن کی کمائی کے قریب ہے، جس کا پہلے دن کا بزنس 57 کروڑ تھا۔ یوں فلم جوان کا دو دن کا مجموعی بزنس 127 کروڑ روپے ہو گیا ہے۔
