قیامِ پاکستان کے اعلان سے قبل بانی پاکستان کی ایک تقریر نہ صرف پاکستان کے لیے اہم اور یادگار ہے بلکہ اس تقریر کے ذریعے قائدِ اعظم محمد علی جناح دنیا کو بتایا کہ ان کا وطن مساوات، بھائی چارے، مذہبی یک رنگی اور امن کو اہمیت دیتا ہے اور یہی اسلامی تعلیمات بھی ہیں۔
بانی پاکستان نے یہ تقریر یومِ آزادی سے چار روز قبل 11 اگست 1947ء کو دستور ساز اسمبلی کے پہلے صدر کی حیثیت سے کی تھی۔ قائدِاعظم کی اس تقریر کو پاکستان اور پاکستان میں اقلیتوں کے حقوق سے متعلق راہ نما تقریر سمجھا جاتا ہے۔
مسلمانانِ برصغیر نے قائدِاعظم کی ولولہ انگیز قیادت اور تحریکِ آزادی کے متوالوں کی لازوال قربانیوں کے بعد 14 اگست 1947ء کو دو قومی نظریہ کی بنیاد پر پاکستان حاصل کیا۔ اسلامیانِ ہند ایک ایسے خطۂ زمین کے حصول میں کام یاب ہوئے جہاں وہ اسلام کے سنہری اصولوں کے مطابق آزادانہ زندگی بسر کر سکتے تھے، لیکن ان کے ساتھ ہندو، سکھ، پارسی، عیسائی اقلیتیں بھی شامل تھیں جن کا احترام اور ان کے حقوق کا تحفظ ضروری تھا۔
قائداعظم محمد علی جناح نے اس تقریر میں کہاکہ ہم نے جن حالات اور جس پرامن طریقے سے پاکستان کو حاصل کیا ہے وہ انتہائی نایاب و بے مثال ہے اور اب ہمیں پاکستان کو دنیا کے لیے ایک مثالی مملکت بنانا ہے۔ تقریر کے اختتام سے قبل قائدِاعظم نے یہاں رہنے والی اقلیتوں سے اپیل کی کہ وہ ترکِ وطن نہ کریں اور پاکستان کو ہی اپنا وطن بنائیں۔ انھوں نے کہا کہ اب آپ آزاد ہیں، اس مملکتِ پاکستان میں آپ اپنے مندروں میں جائیں، اپنی مساجد میں جائیں یا کسی اور عبادت گاہ میں، خواہ آپ کا تعلق کسی مذہب، ذات پات یا عقیدے سے ہو، کاروبارِ مملکت کا اس سے کوئی واسطہ نہیں۔ انھوں نے مزید کہاکہ جیسے جیسے زمانہ گزرتا جائے گا ہندو مسلمان کا فرق مٹتا جائے گا، سیاسی تمیز کے اعتبار سے اور مملکت کے شہری کی حیثیت سے۔ اس سے مراد یہ تھی کہ سب ایک قوم کے فرد ہوں گے۔
بانی پاکستان نے اس تقریر میں ایک اسلامی ریاست کے بنیادی فریضے یعنی مذہبی آزادی کا اعلان فرمایا تھا جو قرآنی احکامات کے عین مطابق ہے۔ قائداعظم کا یہ خطاب ان کی جمہوریت پسندی اور اقلیتوں کے حقوق کے تحفظ کے حوالے سے ان کے زرّیں خیالات کا عکاس ہے۔
