کراچی: اے آر وائی فلمز کی ایکشن اور ڈراما سے بھرپور فلم ’جوانی پھر نہیں آنی 2‘ کا ٹائٹل سانگ اور ویڈیو ریلیز کر دی گئی جس نے آتے ہی ناظرین کے دل جیت لیے۔
تفصیلات کے مطابق اے آر وائی فلمز، سلمان اقبال فلمز، 6 سگما پلس فلمز کے بینر تلے بنائی جانے والی کامیڈی اور رومانس سے بھرپور فلم ’جوانی پھر نہیں آنی‘ پارٹ کے سیکوئل کا ٹائٹل سانگ اور ویڈیو ریلیز کردی گئی۔
ٹائٹل سانگ ’ٹلے والی جوتی‘ کے نام سے بنایا گیا، فوک اور ریپ کےمنفرد امتزاج پر گانے کی دھن کو ترتیب دیا گیا جس میں معروف گلوکار عارف لوہار اور احمد بٹ نے اپنی آواز کا جادو جگایا۔
ایکشن اور ڈراما سے بھرپور فلم رواں سال عید الضحیٰ پر اے آر وائی فلمز کے بینر تلے ریلیز کی جائے گی جس میں نامور اداکار ہمایوں سعید، فہد مصطفی، احمد علی بٹ، واسع چودہری، ثروت گیلانی، ماورا حسین سمیت دیگر ستارے اداکاری کے جوہر دکھائیں گے۔
یہ بھی دیکھیں: جوانی پھر نہیں آنی کے سیکوئل کا ٹائٹل سانگ ریلیز– ویڈیو دیکھیں
واضح رہے کہ جوانی پھر نہیں آنی 2015 میں ریلیز کی گئی تھی جس نے باکس آفس پر کامیابی کے جھنڈے گاڑے، ناظرین کی دلچسپی کو مدنظر رکھتے ہوئے اس کا سیکوئل بنانے کا فیصلہ کیا گیا۔
خیال رہے کہ ایکشن، ڈراما، افراتفری، مذاق مستی اور رومانس سے بھرپور فلم جوانی پھر نہیں آنی کے پہلے پارٹ کی کہانی ان چار دوستوں کے گرد گھومتی تھی جو اپنی شادی شدہ زندگی سے پریشان ہیں اور اپنی ذمہ داریوں سے نالاں ہوکر دباؤ کا شکار ہیں’۔
قبل ازیں بالی ووڈ کے ابھرتے ہوئے معروف اداکار ورن دھون نے فلم کی کامیابی اور کاسٹ کے لیے نیک تمناؤں کا اظہار کیا تھا، انہوں نے ایک ویڈیو ریکارڈ کی جس میں اُن کا کہنا تھا کہ ’جوانی پھر نہیں آنی پارٹ 2 کی شوٹنگ دبئی میں جاری ہے، اس فلم کی کامیابی کے لیے نیک تمناؤں کا اظہار کرتا ہوں‘۔
