کراچی : کے الیکٹرک نے نیپرا اتھارٹی میں ماہانہ فیول چارج ایڈجسٹمنٹ کی درخواست جمع کرادی ہے، ترجمان کا کہنا ہے کہ اس حوالے سے تجاویز بھی دی گئی ہیں۔
اپنے ایک بیان میں ترجمان کے الیکٹرک کا کہنا ہے کہ ماہانہ ایف سی اے کے حوالے سے نیپرا اتھارٹی سے رہنمائی کی درخواست کی ہے۔
انہوں نے بتایا کہ نیپرا میں دائر درخواست جولائی 2023 سے مارچ 2024 (نو ماہ) کے فیول چارج ایڈجسٹمنٹ کی مد میں کی گئی ہے۔
کے الیکٹرک ترجمان کے مطابق پراویژنل فیول چارج ایڈجسٹمنٹ (ایف سی اے) کی مد میں نیپرا میں تین تجاویز دائر کی گئی ہیں۔ نیپرا اتھارٹی تجاویز کے جائزے کے بعد بجلی کے بلوں میں ایف سی اے کے اطلاق کی مدت طے کرے گی۔
ان کا کہنا ہے کہ ایف سی اے کا تعین ماہانہ بنیادوں پر عالمی مارکیٹ میں ایندھن کی قیمتوں میں اتار چڑھاؤ اور نیپرا کے قواعد و ضوابط کے مطابق ہے اور ایف سی اے کا اطلاق ملک بھر کی ڈسکوز پر ہوتا ہے۔
کے الیکٹرک کی درخواست کے مطابق 7 ماہ کا اضافہ فی یونٹ 18.86 روپے بنتا ہے اور 2 ماہ کیلئے کمی کی مد میں 29 پیسے کی درخواست کی گئی ہے جب کہ 2 ماہ کی کمی کو منہا کرکے مجموعی اضافہ فی یونٹ 18.57 روپے بنے گا۔
