کراچی: شہرِ قائد میں اسٹریٹ کرائم کی وارداتیں رک نہ سکیں، وارداتیں بدستور جاری ہیں، اے آر وائی نیوز کے کارکن کو لوٹ لیا گیا، نارتھ کراچی میں چور موٹر سائیکل لے کر فرار ہوگیا، انتظامیہ کے دعوے دھرے کے دھرے رہ گئے۔
تفصیلات کے مطابق کراچی میں اسٹریٹ کرائم کی وارداتوں میں اضافہ ہوگیا، شہر میں ڈکیتوں کی وارداتیں رکنے کا نام نہیں لے رہی ہیں، صدر کے علاقے میں اے آر وائی نیوز کے کارکن کو دفتر سے گھر جاتے ہوئے لوٹ لیا گیا۔
مسلح افراد کارکن سے موبائل فون اورنقدی لوٹ کر فرار ہوگئے، اس کے علاوہ نارتھ کراچی کے علاقے خواجہ اجمیرنگری میں موٹرسائیکل چوری کی واردات ہوئی ہے۔
واردات کی سی سی ٹی وی فوٹیج اے آروائی نیوزکو حاصل ہوگئی، فوٹیج میں ملزم کو موٹرسائیکل کا لاک توڑتے ہوئے دیکھا جاسکتا ہے، ملزم پہلے موٹرسائیکل پر بیٹھنے کا ڈراما کرتا ہے اور کچھ ہی دیر میں اس کا لاک توڑ کر فرار ہوجاتا ہے، متاثرہ شہری نے پولیس کو مقدمے کے لیے درخواست جمع کرادی ہے۔
واضح رہے کہ گزشتہ سال میئر کراچی وسیم اختر کی گاڑی بھی چھینی جاچکی ہے جس کا پولیس تاحال پتا نہیں چلا سکی ہے۔
پی ٹی آئی کے رکن قومی اسمبلی فیصل واواڈا نے بھی اسٹریٹ کرائمز اور اغواء کی وارداتوں کے سلسلے میں پولیس کے ساتھ مل کر کام کرنے کا اعلان کیا تھا جس پر ابھی تک عمل درآمد نہ ہوسکا۔
