The news is by your side.

Advertisement

کراچی : باہمت شہری نے ڈاکو پکڑوا دیئے، ایک ملزم زخمی

کراچی : ملیر میں بہادر شہری نے مزاحمت کرکے ڈاکوؤں کو پکڑوا دیا، دن دہاڑے ہونے والی واردات کے موقع پر وہاں موجود کوئی شخص مدد کو نہیں آیا۔

تفصیلات کے مطابق کراچی کے علاقے ملیر کینٹ روڈ پر ایک  کار سوار  وکیل سے 2ملزمان نے لوٹ مار کرنے کی کوشش کی، اس دوران شہری نے 5منٹ تک مزاحمت کے بعد مسلح ملزمان کو پکڑ لیا۔

گن پوائنٹ پر وکیل کو یرغمال بنائے ملزم کو وہاں موجود ایک نوجوان نے دبوچ لیا، فائرنگ کے بعد ڈاکو اپنے ہی ساتھی کو چھوڑ کر فرار ہوگیا مگر بہادر شہری نے ڈاکو کے ساتھی کو نہ چھوڑا آخر تک لڑتا رہا۔

واقعے کی سی سی ٹی وی فوٹیج میں ملزم اور نوجوان کو گتھم گتھا ہوکر سڑک پر جاتے دیکھا جا سکتا ہے، وہاں موجود ملزم کے دوسرے موٹر سائیکل سوار ساتھی نے اسلحہ نکال کر گولی چلا دی۔

چالاک شہری نے فلمی انداز میں ڈاکو کے ساتھی کو ہی گولی کے آگے کردیا، اپنے ہی ساتھی کو گولی لگتا دیکھ کر ملزم موٹرسائیکل سمیت فرار ہوگیا۔

زخمی ڈاکو نوجوان سے بیچ سڑک پر لڑتا رہا، پھر خود کو چھڑا کر فرار ہوگیا،۔

اس حوالے سے ایس ایس پی ملیر  عرفان بہادر کا کہنا ہے کہ ڈاکوؤں سے مڈبھیڑ دوران بیچ روڈ پر کوئی بھی شخص اس شہری کی مدد کیلئے آگے نہیں آیا ملزم کے ساتھی نے فائرنگ کرکے شہری کو زخمی کرنے کی کوشش کی لیکن گولی اسی کے ساتھی کو جالگی۔

پولیس کے مطابق بعد ازاں زخمی ملزم نے ملیر معین آباد میں پہنچ کر ڈکیتی مزاحمت میں زخمی ہونے کا بہانہ کیا، زخمی ملزم جناح اسپتال علاج کیلئے پہنچا لیکن تھوڑی دیر بعد ہی پولیس نے اسے حراست میں لے لیا۔

ایس ایس پی ملیر نے اے آر وائی نیوز کو بتایا کہ مذکورہ ملزم کے ساتھی کی تلاش میں چھاپے مارے جارہے ہیں اور بہت جلد دیگر ملزمان بھی پکڑے جائیں گے۔

Comments

یہ بھی پڑھیں