کراچی: ایرانی صدر کی آمد پر بند ہونے والی سڑکیں شہریوں کے لیے کب تک کھل جائیں گی، ٹریفک پولیس حکام کا بیان سامنے آگیا۔
تفصیلات کے مطابق ٹریفک پولیس حکام کا کہنا تھا کہ کراچی کی سڑکوں کو شام 7 بجے تک بند رکھا جائے گا جبکہ ٹریفک پلان میں شامل سڑکوں کو جزوی طور پر بند کرنے کا سلسلہ جاری ہے۔
شاہراہ قائدین خداداد کالونی سے نمائش جانے والی سڑک بند ہے، ایم اے جناح روڈ سے صدر جانے والی سڑک بھی بند کردی گئی ہے۔
ٹریفک پولیس نے بتایا کہ سیکیورٹی وجوہات کے پیش نظر سڑکیں محدود مدت کیلئے بند رہیں گی، اس کے بعد سڑک کو آمد و رفت کے لیے کھول دیا جائے گا۔
ایرانی صدر کی آمد کے پیش نظر شارع فیصل اور اطراف کی سڑکوں پرخوش آمدید کے بینرز آویزاں کیے گئے ہیں جبکہ شارع فیصل اور ایئرپورٹ کے اطراف تمام پیٹرول پمپس بند کردیے گئے ہیں۔
واضح رہے کہ سیکیورٹی کے پیش نظر شارع فیصل کو سیل کردیا گیا ہے جبکہ ایرانی صدرکے دورہ کراچی کے موقع پر سخت سیکیورٹی انتظامات کیے گئے ہیں۔
