کراچی: صوبہ سندھ کے دارالحکومت کراچی میں ایک سیکیورٹی گارڈ بھاری رقم سامنے دیکھ کر بھی ثابت قدم رہا اور ایمانداری سے اسے اس کے مالک کو واپس لوٹا دی۔
اے آر وائی نیوز کے مارننگ شو باخبر سویرا میں محمد پرویز نامی سیکیورٹی گارڈ نے شرکت کی اور اس سارے واقعے کے بارے میں بتایا۔
محمد پرویز کا کہنا تھا کہ وہ ایک مال میں گارڈ کی ملازمت کرتے ہیں، 20 جنوری کے روز انہیں سیڑھیوں پر ایک سیاہ رنگ کا شاپنگ بیگ دکھائی دیا جس میں پیسوں کی جھلک بھی دکھائی دے رہی تھی۔
انہوں نے وہ شاپنگ بیگ اٹھایا اور سیدھا ایڈمن آفس لے گئے، ساتھ ہی وہ دعا کر رہے تھے کہ یہ رقم جس شخص کی بھی ہے اس تک پہنچانے میں اللہ ان کی مدد کرے۔
ایڈمن آفس میں بیگ کھولا گیا تو اندر سے ساڑھے 7 لاکھ روپے کی رقم نکلی۔
محمد پرویز کا کہنا تھا کہ انہوں نے مطلوبہ شخص کو سی سی ٹی وی کیمروں کے ذریعے ٹریس کیا۔
مذکورہ شخص شاپر کو جیکٹ کی جیب میں ڈالے، اور جیکٹ کو بازو پر لٹکائے ہوئے تھا، چلنے کے دوران بیگ جیکٹ سے پھسل کر گر گیا۔
رقم ملنے پر وہ شخص محمد پرویز کا بے حد شکر گزار ہوا اور انہیں انعام بھی دیا۔
