کراچی : گلشن حدید کے غیر رجسٹرڈ نجی اسکول کے پرنسپل کی جانب سے مختلف خواتین سے نا زیبا وڈیو سامنے آنے کے بعد انتظامیہ نے اسکول کو سیل کردیا۔
تفصیلات کے مطابق کراچی کے علاقے گلشن حدید میں نجی اسکول پرنسپل کی خواتین سے مبینہ زیادتی کے اسکینڈل کی تحقیقات کے لئے محکمہ تعلیم کی جانب سے تشکیل دی گئی کمیٹی نجی اسکول پہنچی۔
ڈپٹی ڈائریکٹر پرائیوٹ اسکولز قربان علی بھٹو نے کہا کہ واقعہ انتہائی شرمناک ہے،مکمل تحقیقات ہوں گی ، اسکول سے وابستہ لوگوں کے بیان ریکارڈ کریں گے۔
قربان علی بھٹو کا کہنا تھا کہ کل ہی ڈپٹی کمشنر ملیر کو خط لکھا کہ اسکول کوسیل کیا جائے، اب کوشش ہے اسکول کے طلباکو کسی اور اسکول میں داخل کرائیں۔
محکمہ تعلیم کی جانب سے ڈپٹی کمشنر ملیر کو لیٹر بھیجنے کی روشنی میں اسسٹنٹ کمشنر بن قاسم کی سربراہی میں ٹیم نے پہنچ کر اسکول کو سیل کردیا گیا ہے۔
یاد رہے گذشتہ روز گلشن حدید میں اسکول پرنسپل کی اپنی ٹیچرز اور اسٹاف سے زیادتی کرنے کا واقعہ سامنے آیا تھا، ملزم ویڈیو بناکر خواتین کی مجبوری کا فائدہ اٹھاتا اور بلیک میل بھی کرتا تھا، جسے علاقہ مکینوں کی مدد سے گرفتار کیا گیا۔
پولیس نے بتایا کہ ملزم کے موبائل سے پچیس سے زائد ویڈیو بھی برآمد ہوئی ہیں، سارے معاملے پر چار رکنی کمیٹی تشکیل دے دی گئی ہے۔
نگران وزیر داخلہ بریگیڈیر (ر) حارث نواز نے بھی نوٹس لیکر ملزم کو انجام تک پہنچانے کی یقین دہانی کرائی ہے۔
