کراچی: شہر قائد کے سب سے بڑے منشیات ڈیلر ریاست عرف جدگال نے منشیات فروخت سے متعلق ہوشربا انکشاف کیے ہیں۔
تفصیلات کے مطابق کراچی کے منشیات ڈیلر ریاست عرف جدگال نے انٹیروگیشن رپورٹ میں ہوشربا انکشاف کیا ہے، ڈیلر نے بتایا کہ اڈے پر روزانہ 50 سے 60 لاکھ روپے کی منشیات فروخت ہوتی ہے۔
منشیات ڈیلر نے بتایا کہ میرا بھائی عابد بڑے پیمانے پر منشیات کا کاروبار کرتا ہے، میرے بھائی نے منشیات کے کام میں آنے کی آفر کی تو میں نے حامی بھر لی، میں پاک کالونی اڈے پر چرس اور آئس فروخت کرتا تھا۔
ریاست نے کہا کہ ہمارے اڈے پر چرس، آئس، کرسٹل اور دیگر منشیات فروخت ہوتی ہیں، تمام منشیات میرا بھائی ایران اور دیگر ممالک سے اسمگل کر کے لاتا ہے، گولیمار میں بھی منشیات فروش ڈیلرز کو ہم سپلائی کرتے ہیں۔
انٹیروگیشن رپورٹ کے مطابق منشیات ڈیلر نے بتایا کہ پرانا گولیمار میں منشیات کے اڈے بڑھانے، تحفظ کیلئے اسلحہ خریدنا چاہتا تھا، ہمیں مخالفین کے منشیات اڈوں کو ختم کرنے کیلئے بھی اسلحے کی ضرورت تھی۔
کراچی کے منشیات ڈیلر نے کہا کہ اسلحے کی خریداری کی ذمہ داری اپنے کارندے رضا کو سونپی تھی، رضا کے پی میں موجود وہاب پٹھان سے اسلحے کی ڈیلنگ کر رہا ہے جبکہ میرے اڈے سے منشیات فروشی کے کام لیاقت انجام دے رہا ہے۔
