کویت سٹی : حکومت نے اس بات کا فیصلہ کیا ہے کہ کویت میں مقیم غیر ملکیوں کیلئے مخصوص شناختی کارڈ "بطاقہ نظام "ختم کرکے اس کی جگہ صرف رہائشیوں کو شناختی کارڈ جاری کیا جائے۔
اس حوالے سے وزارت داخلہ نے ایک جامع منصوبہ تیار کیا ہے جس کا مقصد تارکین وطن کے سول شناختی کارڈ کو منسوخ کرکے اسے صرف کویتی شہریوں تک محدود رکھا جائے۔
ذرائع کے مطابق وزارت داخلہ کے محکمہ برائے رہائشی امور کا مقصد کویت میں غیر ملکیوں کیلئے خصوصی مقناطیسی کارڈ کا اجراء کرنا ہے جس میں ان کی تمام تفصیل اور اعداوشمار شامل ہوں۔
یہ کارڈ تمام ریاستی اداروں اور ایجنسیوں میں باضابطہ طور پر استعمال ہوسکے گا اس طرح سول شناکتی کارڈ کا استعمال ختم ہوجائے گا۔
وزارت داخلہ کا محکمہ برائے رہائشی امور ملک میں رہنے والوں کو قانونی رہائش کی سہولت جاری کرتا ہےاور تارکین وطن کو ویزا جاری کیا جاتا ہے۔ دنیا کے بیشتر ممالک میں غیر ملکیوں کو ریذیڈنٹ کارڈ جاری کیے جاتے ہیں جس میں ان کا تمام ریکارڈ اور تفصیلات موجود ہوتی ہیں۔
ذرائع کے مطابق سول شناختی کارڈ اب صرف کویتی باشندوں تک ہی محدود کردیا جائے گا اس سے پبلک اتھارٹی کے دفاتر پر رش کم ہوگا، پی اے سی آئی کے قیام سے اب تک 30ملین کارڈ جاری کیے جاچکے ہیں۔
