کراچی : ڈی سی ویسٹ آفس میں بلدیاتی انتخابات کے ووٹوں کی ری کاؤنٹنگ کے باعث منگھوپیر روڈ کو دونوں جانب سے کنٹینرز لگا کر بند کردیا گیا۔
تفصیلات کے مطابق ڈی سی ویسٹ آفس میں بلدیاتی انتخابات کے ووٹوں کی ری کاؤنٹنگ کے لئے منگھوپیر روڈ کو اچانک دونوں جانب سے بند کردیا گیا۔
پولیس کی جانب سے ڈی سی آفس کے اطراف کنٹینرز لگا دیے گئے، پولیس حکام نے بتایا کہ ایک کلومیٹرکی حد تک کسی کو آنے کی اجازت نہیں، صرف پولنگ عملہ،امیدواراورمتعلقہ افرادکواجازت ہوگی۔
پولیس حکام کا کہنا تھا کہ ممکنہ خراب صورتحال کے پیش نظر کنٹینرز لگائے گئے ہیں کیونکہ اس سے قبل ڈی سی آفس میں پی ٹی آئی اور پی پی کارکنان میں جھگڑاہوا تھا۔
اچانک کنٹینرزلگانے سے شہریوں کو شدید مشکلات کا سامنا ہے ، پولیس کی جانب سے بغیر کسی اطلاع سڑک کو بند کیا گیا ہے۔
ٹریفک پولیس کا کہنا ہے کہ ٹریفک کو ولیکا روڈ سے حبیب چورنگی بھیجاجارہاہے جبکہ نورس چورنگی سےٹریفک کوسیمنزچورنگی کی طرف بھیج رہےہیں۔
دوسری جانب بلدیاتی الیکشن میں دوبارہ گنتی کئے معاملے پر پولیس حکام نے کہا کہ دوبارہ گنتی کا وقت تبدیل کر دیا گیا، پہلے گنتی 9بجے ہونا تھی،اب ساڑھے11بجے کر دیا گیا ہے۔
حکام کا کہنا تھا کہ 200 سے زائد پولیس اہلکاروں کو تعینات کیاگیاہے، اس سے قبل ڈی سی آفس میں کئی افراد کو یرغمال بنایا گیا تھا، ممکنہ صورتحال کے تناظر میں اقدامات کئے گئے ہیں۔
