اسلام آباد: سنی علما کونسل کے مرکزی ڈپٹی سیکرٹری جنرل مولانا علامہ مسعودالرحمان عثمانی قتل کیس میں بڑی پیشرفت ہوئی ہے۔
تفصیلات کے مطابق وفاقی پولیس نے علما کونسل کے مرکزی ڈپٹی سیکرٹری جنرل مولانا علامہ مسعودالرحمان قتل میں ملوث ملزمان کا سراغ لگا لیا، ٹارگٹ کلنگ میں ابتدائی طور پر چار ملزمان ملوث نکلے۔
وفاقی پولیس ذرائع کا بتانا ہے کہ ملزمان کا تعلق ایک مذہبی کالعدم تنظیم سے بتایا گیا ہے، آئندہ چند دنوں میں ملزمان کی گرفتاری متوقع ہے۔
وفاقی پولیس ذرائع کے مطابق ملزمان نے راولپنڈی سے مولانا علامہ مسعود الرحمان کا پیچھا کیا تھا، دو ملزمان کی ذمہ داری ریکی اور دو کو فائرنگ کرنے کی تھی، پولیس کو ایک فوٹیج کے ذریعے ملزمان کی شناخت ممکن ہوئی ہے۔
واضح رہے کہ رواں ماہ 5 جنوری کو وفاقی دارالحکومت اسلام آباد میں مولانا مسعود الرحمن عثمانی قاتلانہ حملے میں جاں بحق ہو گئے تھے۔
اسلام آباد میں موٹر سائیکل سوار ملزمان نے مسعود الرحمٰن عثمانی پر فائرنگ کی تھی، زخموں کی تاب نہ لاتے ہوئے وہ چل بسے تھے۔
