سانحہ 9 مئی کو ایک سال مکمل ہونے پر عوام کا ملوث افرادکوسخت سزادینے کا مطالبہ کردیا جبکہ شہدا کے لواحقین کے زخم آج بھی تازہ ہیں۔
تفصیلات کے مطابق سانحہ9مئی کوایک سال پوراہونے پرعوام نے مذمت کرتے ہوئے ملوث افرادکوسخت سزا دینے کا مطالبہ کردیا۔
سانحہ 9 مئی واقعے پر شہدا کے لواحقین کی دل آزاری ہوئی اورانکے زخم آج بھی تازہ ہیں، لیفٹیننٹ کرنل افتخاراحمدشہید کے والد نے کہا کہ گزشتہ سال9مئی کو جو المناک واقعہ ہوا وہ کسی کو بھولا نہیں،اس پرپوراملک افسردہ ہے۔
شہید کی والدہ کا کہنا تھا کہ 9مئی کوشہداکی جوتذلیل کی گئی وہ ہمارےدلوں کو ہر وقت دکھاتی ہے، عناصر آج بھی ملک میں انتشار پھیلا رہے ہیں، حکومت سےاپیل ہےان شرپسند عناصر کو ایسی سزا دی جائے کہ ان کی آنے والی نسلیں بھی یاد رکھیں۔
والدہ میجر جہانزیب عدنان شہید نے کہا کہ ہمیں ان کی عزت کرنی چاہیے جو اپنی جان خطرے میں ڈال کر ملک کی حفاظت کر رہے ہیں، ہمیں ان افراد کے ساتھ سختی سے پیش آنا چاہیے جنہوں نے ان شہداکی یادگاروں کی بے حرمتی کی۔
میجر یاسر شہید کی بیوہ کا کہنا تھا کہ ہمارے شہدانے اپنی جانیں سرزمین پاکستان کے دفاع میں قربان کی جو شہداکا ہم پر احسان ہے، جو قومیں اپنے محسنوں کی قدر نہیں کرتی وہ تاریخ کے صفحات سے مٹ جاتی ہے۔
،والد کیپٹن صغیر عباس شہید نے اپنے خیالات کے اظہار کرتے ہوئے کہا کہ جن شرپسندوں نے شہداکی یادگاروں کی بے حرمتی کی اُن کے خلاف فوری ایکشن لیا جائے۔
نائب صوبیدار صنوبر علی شہید کے بیٹے نے کہا کہ گزشتہ سال جس طرح شہداکی یادگاروں کی تذلیل کی گئی وہ انتہائی قابل مذمت ہے۔
سپاہی محمد یاسین شہید کی بیوہ نے سوال کیا کیا ہمارے شہدانے یہ قربانیاں اس لیے دی تھیں کہ ان کی تذلیل اور بے حرمتی کی جائے؟ جبکہ بیٹی کا کہنا تھا کہ شہید کی بیٹی ہونے کے ناطے حکومت سے اپیل کرتی ہوں کہ نو مئی میں ملوث افراد کو جلد سے جلد سزا دی جائے۔
بیٹاحوالدار نظر حسین شہید نے کہا ہمارا فرض ہے ہم شہدا کی قربانیوں کو یاد رکھیں اور جنہوں نے ان کی تصویروں کو جلایا ان کو نشان عبرت بنائیں جبکہ والدسپاہی قاسم شہید کا کہنا تھا کہ شہداکی عزت کرنا ہم پر فرض ہے اور ہم ان کی تصویروں کی بے حرمتی برداشت نہیں کریں گے۔
