کراچی: وزیر اعظم پاکستان شہباز شریف نے مزار قائد پر مہمانوں کی کتاب میں اپنے تاثرات رقم کرتے ہوئے آخر میں اپنے نام کی جگہ ’خادم پاکستان‘ لکھ دیا۔
تفصیلات کے مطابق وزیر اعظم شہباز شریف کراچی کے دورے پر آئے ہوئے ہیں، شہر قائد پہنچتے ہی انھوں نے قائد اعظم محمد علی جناح کے مزار پر جا کر فاتحہ خوانی کی۔
وزیر اعظم نے مزار قائد پر مہمانوں کی کتاب میں تاثرات بھی لکھے، انھوں نے لکھا قائد! میں آپ کی آخری آرام گاہ پر بصد احترام حاضر ہوں، اور شکر گزار ہوں کہ آپ نے ہمیں ایک الگ ملک دیا۔
میاں محمد شہباز شریف نے لکھا قائد! ہم دل کی گہرائیوں سے معذرت چاہتے ہیں، ہم اس راستے پر نہیں چل سکے، جس کی آپ کو ہم سے امید تھی، اور یوں آپ کی روح کو مایوس کر دیا، میں وعدہ کرتا ہوں کہ عوام کی بہتری کے لیے اپنی بھرپور صلاحیتیں بروئے کار لاؤں گا۔
انھوں نے مزید لکھا قائد! آپ کی امیدوں کے مطابق زندگی گزارنے کی کوشش کریں گے۔ شہباز شریف نے تاثرات کے اختتام پر اپنے نام کی جگہ خادم پاکستان تحریر کر دیا۔ وزیر اعظم نے یہ تاثراتی نوٹ انگریزی میں لکھا۔
