کراچی: محکمہ موسمیات پاکستان ڈائریکٹر جنرل کے بغیر کے کام کرنے پر مجبور ہے، ذرائع کا کہنا ہے کہ ملک میں ہونے والی حالیہ بارشوں کے دوران محکمہ موسمیات ڈی جی کے بغیر کام کرتا رہا ہے۔
ذرائع کے مطابق محکمہ موسمیات کے سابقہ ڈی جی کو عہدے سے ریٹائرڈ ہوئے ایک ماہ گزر چکا ہے، پی ایم ڈی کے سابق ڈائریکٹر جنرل مہر صاحبزاد خان مارچ کے آخر میں ریٹائر ہو گئے تھے، تاہم حکومت نے اب تک مستقل ڈی جی کا تقرر نہیں کیا۔
ذرائع کا کہنا ہے کہ پاکستان محکمہ موسمیات کی کارکردگی متاثر ہو رہی ہے، نئے ڈی جی کی تقرری میں تاخیر کا باعث ہوا بازی کی وزارت میں ہونے والی لابنگ ہے، ایوی ایشن ڈویژن میں کچھ افراد سابق ڈی جی کو ریٹائرمنٹ کے بعد توسیع دلانے کے لیے سرگرم ہیں۔
آج بارش کہاں کہاں ہوگی؟
واضح رہے کہ ریٹائرڈ ڈی جی کے بعد چیف میٹرولوجسٹ سردار سرفراز سینیارٹی کی بنیاد پر نئے ڈی جی تعینات ہونے تھے، سردار سرفراز پی ایچ ڈی ڈگری ہولڈر ہیں، 7 ریسرچ پبلیکیشنز شائع ہو چکی ہیں اور ان کے 88 سائٹیشنز (حوالے) دیے گئے ہیں، وہ ورلڈ میٹرولوجیکل آرگنائزیشن کے مختلف کمیشنز اور کمیٹیوں میں کام کا وسیع تجربہ رکھتے ہیں۔