نیویارک: پاپ میوزک کی دنیا کے معروف آنجہانی گلوکار مائیکل جیکسن کی جیکٹ 2 لاکھ 98 ہزار ڈالر میں نیلام کردی گئی۔
جولین آکشن ہاؤس کی جانب سے جاری بیان کے مطابق مائیکل جیکسن کے پہلے ورلڈ ٹور میں زیراستعمال جیکٹ کو نیلامی کے لیے 10 نومبر بروز اتوار پیش کیا گیا تھا جس کی پشت پر سلور مارکر سے گلوکار کے دستخط موجود تھے۔
نیلامی کی تقریب 10 نومبر کو ٹائمز اسکوائر نیویارک کے کیفے ہارڈراک میں منعقد کی گئی جس میں جیکٹ کی قیمت ایک لاکھ ڈالر رکھی گئی تھی مگر جب بولی لگنے کا سلسلہ شروع ہوا تو ہر کسی نے اسے خریدنے کی کوشش کی یہی وجہ ہے کہ تین گھنٹے تک ہر دوسرے شخص نے اسکے مہنگے دام لگائے۔
مقامی شہری اور مائیکل جیکسن کے مداح نے بولی کی قیمت 2 لاکھ 98 ہزار امریکی ڈالر لگائی جو پاکستانی کرنسی کے حساب سے (3 کروڑ 97 لاکھ 29ہزار 360 روپے) بنتی ہے۔
انتظامیہ نے سب سے زیادہ بولی لگانے والے شہری کو کامیاب قرار دیا اور سیاہ رنگ کی جیکٹ کو اصل قیمت سے تین گنا زیادہ میں فروخت کیا۔
جولین کی جانب سے جاری اعلامیے کے مطابق جیکٹ مائیکل جیکسن کی کچھ قیمتی اشیاء میں سے ایک تھی، انہوں نے پہلے دنیا کے دورے پر اسے زیب تن کیا تھا اور ہر کنسرٹ میں اسی کے ساتھ پرفارم بھی کیا تھا۔
گلوکار جیکٹ کو اپنے لیے خوش قسمتی کا باعث بھی سمجھتے تھے، اُن کا ماننا تھا کہ ورلڈ ٹور ’بیڈ‘ کی کامیابی کا سہرا موسیقاروں اور جیکٹ کو جاتا ہے۔
مائیکل جیکسن کی “بیڈ” جیکٹ ٹیکساس کی معروف کاروباری شخصیت ملٹن ویرٹ کی ملکیت میں تھی۔
یاد رہے کہ آنجہانی گلوکار نے 1980 کی دہائی میں اپنے ساتویں البم ’بیڈ‘ ریلیز ہونے کے بعد دنیا بھر کا دورہ کیا تھا جو دو سال کے عرصے پر محیط تھا، 12 ستمبر 1987 کو شروع ہونے والا سفر 27 جنوری کو اختتام پذیر ہوا تھا، اس دوران انہوں نے 15 ممالک میں 123 کنسرٹس کیے تھے۔
پاپ گلوکار کے گزر جانے کے بعد ٹیکساس کے تاجر اور مائیکل جیکسن کے مداح نے اُن کے زیر استعمال دو جیکٹوں کو بطور نشانی بھاری رقم کے عوض خرید لیا تھا، گزشتہ ماہ تاجر نے اعلان کیا تھا کہ وہ اس جیکٹ کو فروخت کر کے رقم فلاحی کاموں میں عطیہ کرنا چاہتے ہیں۔
ما ئیکل جیکسن اپنے منفرد انداز کی وجہ سے دنیا بھر میں آج بھی مقبول ہیں، اپنے پہلے البم آئی وانٹ یو بیک سے ہی مائیکل جیکسن دنیا بھر میں مشہور ہوگئے تھے۔
انیس سوبیاسی میں مائیکل جیکسن کا البم تھرلر ریلیز ہوا اور دنیائے میوزک میں تہلکہ مچا دیا تھا،اس البم کو آج بھی دنیا میں سب سے زیادہ فروخت ہونے والے میوزک البم کا اعزاز حاصل ہے۔
تھرلر کی صرف امریکا میں ہی تیس کروڑ کیسٹس فروخت ہوئیں جبکہ پوری دنیا میں اس کی سوکروڑ سے زیادہ کاپیاں فروخت ہوئیں، مائیکل جیکسن کے البم ’تھریلر‘ کو آٹھ گریمی ایوارڈ ملے ہیں جو کہ ایک بڑا ریکارڈ ہے۔
مائیکل جیکسن نے تھرلر البم کے گیت ‘بلی جین’ پر رقص میں ایک نئی حرکت (مون واک) متعارف کروائی جسے دیکھ کر لوگ ششدر رہ گئے تھے۔
تھرلر‘ کے بعد مائیکل جیکسن کا البم ’بیڈ‘ سامنے آیا، جس کی بیس لاکھ کاپیاں فروخت ہوئیں، ‘بیڈ‘ کے بعد جیکسن کا البم ’ڈینجرس‘ بھی سپر ہٹ ہوا۔
مائیکل نے 1994 میں آنجہانی امریکی گلوکار ایلوس پریسلے کی بیٹی لیزا میری پریسلے سے شادی کر لی، جو صرف انیس ماہ چل سکی۔
انیس سو ستانوے میں مائیکل جیکسن کو راک اینڈ رول ہال آف فیم میں شامل کر لیا گیا اور انہوں نے غیر متوقع طور پر ایک نرس ڈیبی رو سے شادی کر لی تھی، جس سے ان کا بیٹا پرنس مائیکل پیدا ہوا، 1998 میں ان دونوں کی ایک بیٹی پیرس مائیکل کیتھرین پیدا ہوئی جبکہ سنہ 1999 میں مائیکل اور ڈیبی کی راہیں جدا ہوگئیں تھیں۔
موسیقی کی دنیا میں نئے رجحانات متعارف کرانے والے مائیکل جیکسن 25 جون 2009 ء کو گولیوں کی زائد مقدار لینے کی وجہ سے دل کا دورہ پڑا جو جان لیوا ثابت ہوا۔
مرنے کے بعد بھی مائیکل جیکسن کا نام سب سے زیادہ آمدنی حاصل کرنے والے گلوکاروں میں سرفہرست رہا، ان کی موت کے بعد ادھورا گانا دس ازاٹ ریلیز ہوا، جس نے اتنا بزنس کیا جتنا مائیکل جیکسن اپنے دور عروج میں حاصل کرتے رہے۔
