اسلام آباد : اسلامی جمہوریہ پاکستان کی 15 ویں قومی اسمبلی کے نومنتخب اراکین نے حلف اٹھا لیا، آئندہ پانچ سال کے لیے منتخب ہونے والے ارکان سے اسپیکر قومی اسمبلی سردار ایازصادق نے حلف لیا۔
تفصیلات کے مطابق آج 13 اگست بروز پیراسپیکرایازصادق کی زیرصدارت ملک کی 15 ویں قومی اسمبلی کا پہلا اجلاس منعقد، قومی ترانے، تلاوت کلام پاک اورنعت کے بعد اجلاس کی باقاعدہ کارروائی کا آغاز ہوا۔
ملک کی 15 ویں قومی اسمبلی کے پہلے اجلاس کی صدارت کرتے ہوئے اسپیکرایازصادق نے قومی اسمبلی کے 342 اراکین میں سے 331 ارکان سے حلف لیا۔
نومنتخب اراکین کی جانب سے اسمبلی رجسٹرپرحروف تہجی کے تحت دستخط کیے گئے، اورسابق صدر آصف علی زرداری نے سب سے پہلے رجسٹرپردستخط کیے۔ تحریکِ انصاف کے سربراہ عمران خان کے دستخط کرنے کے موقع پر ایوان پارٹی نعروں سے گونجتا رہا۔
سردارایاز صادق نے اجلاس کے آغاز میں نومنتخب اراکین کو مبارک باد دی اور حلف برداری کے طریقہ کار سے آگاہ کیا۔
حلف برداری سے قبل اسپیکر ایازصادق نے قومی اسمبلی کے اسپیکراور ڈپٹی اسپیکرکے انتخاب کے لیے 15 اگست کی تاریخ کا اعلان کیا اور اس کا طریقہ کار بھی بتایا۔
15 اگست کو نومنتخب اسپیکرقومی اسمبلی ایوان کی کارروائی سنبھال کرڈپٹی اسپیکرکا الیکشن کروائیں گے، اسپیکراورڈپٹی اسپیکرکے لیے انتخاب خفیہ رائے شماری کے ذریعے ہوگا۔
حلف برداری کی اس خصوصی تقریب کے موقع پرپاکستان تحریک انصاف کے سربراہ عمران خان، وائس چیئرمین شاہ محمود قریشی، فواد چوہدری، شفقت محمود، پیپلز پارٹی کے چیئرمین بلاول بھٹو، شریک چیئرمین آصف علی زرداری، یوسف رضا گیلانی، ایم کیو ایم کے خالد مقبول صدیقی، نوید قمر، قوم پرست رہنما سردار اخترمینگل، شیخ رشید ، مسلم لیگ ن کے سربراہ شہباز شریف ، احسن اقبال، اور دیگر دیگراراکین قومی اسمبلی میں موجود ہیں۔
چیئرمین پیپلزپارٹی بلاول بھٹو زرداری سمیت کئی نو منتخب اراکین نے پہلی بارقومی اسمبلی کی رکنیت کا حلف اٹھایا۔
سیکیورٹی انتظامات
قومی اسمبلی کے اجلاس کے پیش نظرریڈ زون سمیت ضلع بھر میں سیکیورٹی ریڈ الرٹ رکھی گئی ہے، ریڈ زون میں کسی بھی غیرمتعلقہ فرد کو داخلے کی اجازت نہیں دی گئی جبکہ سیکیورٹی کے لیے پولیس اوررینجرز کے اہلکار تعینات کئے گئے ہیں۔
واضح رہے کہ قومی اسمبلی کا اجلاس نگراں وزیراعظم جسٹس ریٹائرڈ ناصرالملک کی سفارش پرصدر مملکت نے 13 اگست کو بلانے کی منظوری دی تھی۔
