لاہور: پی سی بی مینجمنٹ کمیٹی کے چیئرمین ذکا اشرف نے محمد حفیظ کو چیف سلیکٹر بننے کی پیشکش کردی۔
اے آر وائی نیوز کے مطابق پی سی بی مینجمنٹ کمیٹی کے چیئرمین ذکا اشرف سے سابق کپتان محمد حفیظ کی ملاقات ہوئی اس دوران انہیں چیف سلیکٹر بننے کی پیشکش کی گئی۔
ذرائع کا بتانا ہے کہ محمد حفیظ نے پیشکش پر مشاورت کے لیے وقت مانگا ہے۔
ذرائع کا یہ بھی کہنا ہے کہ عامر سہیل، یونس خان، انضمام الحق، محسن خان کو بھی اہم ذمہ داری سونپی جاسکتی ہے۔
ذکا اشرف نے پی سی بی سیٹ اپ میں شعیب اختر کو شامل کرنے پر بحث کے دوران ان کا نام مسترد کردیا۔
علاوہ ازیں شاہد اسلم کو پاکستان کرکٹ ٹیم کا منیجر مقرر کردیا گیا ہے اس سے قبل شاہد اسلم قومی ٹیم کے اسسٹنٹ کوچ اور اسسٹنٹ منیجر رہ چکے ہیں۔
واضح رہے کہ ذکا اشرف نے پی سی بی مینجمنٹ کمیٹی کے چیئرمین کی حیثیت سے چارج سنبھال لیا ہے۔
نئی مینجمنٹ کمیٹی 4 ماہ کےلئے بنائی گئی ہے۔ مینجمنٹ کمیٹی کرکٹ بورڈ کے آئی سی سی سمیت دیگر امور کو دیکھے گی۔
پی سی بی کی مینجمنٹ کمیٹی 10 رکنی ہے جس میں کلیم اللہ خان، اشفاق اختر، مصدق اسلام، عظمت پرویز، ظہیر عباس، خرم سومرو، خواجہ ندیم، مصطفی رمدے، ذوالفقار ملک شامل ہیں۔
