کراچی: سی ٹی ڈی شعبہ تفتیش نے خفیہ اطلاع پر ایم کیو ایم لندن کورنگی سیکٹر کے مفرور سابقہ یونٹ انچارج وصی خان کو گرفتار کر لیا۔
تفصیلات کے مطابق انچارج سی ٹی ڈی چوہدری صفدر نے بتایا کہ ایم کیو ایم لندن کے ایک سابقہ یونٹ انچارج وصی خان عرف کاشف کو گرفتار کر لیا گیا ہے، ملزم 2019 سے 2014 ک یونٹ 74 کا انچارج رہا۔
ملزم وصی خان عرف کاشف نے دوران تفتیش اہم انکشافات کیے، اس نے بتایا کہ اسے تمام ہدایات سیکٹر انچارج رئیس مما کی طرف سے ملتی تھی، اور وہ قتل کی متعدد وارداتوں میں ملوث رہا۔
انچارج سی ٹی ڈی کے مطابق ملزم وصی خان نے بتایا کہ اس نے 2010 میں سی ٹی ڈی اہلکار دانش کو فائرنگ کر کے زخمی کیا، 2012 میں جلیبی چوک پر فائرنگ کر کے ایم کیو ایم حقیقی کے 2 لڑکوں کو قتل کیا۔
2013 کورنگی سی ایریا میں اے ایس آئی حاجی ندیم کو قتل کیا، 2013 لانڈھی یونٹ 80 کے ساتھ ایم کیو ایم حقیقی کے کئی کارکنوں کو قتل کیا، 2013 کربلا گراؤنڈ لانڈھی میں 2 لڑکوں کو قتل کیا۔
2013 میں پولیس اہلکار ندیم قادری کے گھر میں گھس کر فائرنگ کی، گولیاں لگنے سے پولیس اہل کار ندیم زخمی اور بھتیجا ہلاک ہوا، 2014 میں ابراہیم حیدری میں موبائل پر فائرنگ کر کے 2 اہل کاروں کو شہید کیا۔
چوہدری صفدر کے مطابق ملزم اس سے قبل ہینڈ گرنیڈ اور قتل کے مقدمات میں جیل جا چکا ہے، گرفتار ملزم سے ایم کیو ایم لندن سیٹ اپ کے متعلق تفتیش کی جا رہی ہے۔
