ایچ بی ایل پاکستان سپر لیگ 8 میں ملتان سلطانز ٹرافی تو نہ جیت شکی لیکن ایوارڈز کا میلہ لوٹ کر شائقین کرکٹ کے دل ضرور جیت لیے۔
اے آر وائی نیوز کے مطابق دنیا کی مقبول ترین لیگ ایچ بی ایل پاکستان سپر لیگ کا آٹھواں سیزن کامیابی کے ساتھ لاہور قلندرز کی فتح پر اختتام پذیر ہوگیا۔ ملتان سلطانز گزشتہ سال کی طرح ایک بار پھر ٹرافی تھامنے میں ناکام رہی تاہم ایوارڈ کا میلہ اسی ٹیم کے نام رہا اور اس کے کھلاڑیوں نے 6 اعزازات حاصل کیے۔
ملتان سلطانز کی دریافت اور پورے ٹورنامنٹ میں اپنی شاندار کارکردگی سے سب کو متوجہ کرنے کے ساتھ افغانستان کے خلاف تین ٹی ٹوئنٹی میچوں پر مشتمل سیریز کے لیے قومی ٹیم میں جگہ پانے والے احسان اللہ ٹورنامنٹ میں 22 وکٹیں لے کر پلیئر آف دی ٹورنامنٹ اور بیسٹ بولر کے ایوارڈز حاصل کیے۔ وہ یہ اعزاز پانے والے پہلے بولر بن گئے۔
ملتان سلطانز کے کپتان نے ٹورنامنٹ میں سب سے زیادہ ساڑھے پانچ سو رنز بنائے اور وہ حنیف محمد کیپ کے حقدار ٹھہرے اس کے ساتھ ہی بہترین وکٹ کیپر کا اعزاز بھی ان کے حصے میں ہی آیا۔
ٹورنامنٹ میں 23 وکٹیں اڑانے والے عباس آفریدی کو فضل محمد کیپ اور ایمرجنگ کرکٹر آف دی ٹورنامنٹ کا ایوارڈ دیا گیا جب کہ بہترین فیلڈر کا ایوارڈ پولارڈ نے جیتا۔
