The news is by your side.

Advertisement

صوبائی حکومت 56 اداروں کو تحویل میں لے چکی ہے: مرتضیٰ وہاب

کراچی: مشیر اطلاعات سندھ مرتضیٰ وہاب کا کہنا ہے کہ نیشنل ایکشن پلان (نیپ) کے تحت 56 اداروں کو صوبائی حکومت تحویل میں لے چکی ہے، چاہتے ہیں ادارے عوامی مفاد میں کام کرتے رہیں۔

تفصیلات کے مطابق مشیر اطلاعات سندھ مرتضیٰ وہاب نے میڈیا سے گفتگو کرتے ہوئے کہا کہ کراچی روشنیوں کا شہر ہے اور رہے گا، پاکستان سپر لیگ کو شاندار کامیابی سے ہمکنار کروائیں گے۔ چاہتے ہیں کہ اگلے سال حیدر آباد میں بھی پی ایس ایل میچز ہوں۔

مرتضیٰ وہاب کا کہنا تھا کہ چاہتے ہیں کہ پی ایس ایل کے ذریعے اندرون سندھ کا ٹیلنٹ ابھر کر سامنے آئے، سندھ سے ابھرنے والا ٹیلنٹ آئندہ سال پی ایس ایل میں شامل ہو۔ پی ایس ایل کے ذریعے مثبت تشخص اجاگر ہوگا۔ پی ایس ایل نے کراچی میں جشن کا سماں پیدا کر دیا ہے۔

انہوں نے کہا کہ سندھ کا مقدمہ پاکستان کرکٹ بورڈ کے سامنے رکھا، پورا پی ایس ایل اگلے سال کراچی میں کروانے کو تیار ہیں۔

مرتضیٰ وہاب کا کہنا تھا کہ نیشنل ایکشن پلان (نیپ) کے تحت 56 اداروں کو صوبائی حکومت تحویل میں لے چکی ہے، چاہتے ہیں ادارے عوامی مفاد میں کام کرتے رہیں۔ اداروں کی صرف انتظامیہ تبدیل ہوئی ہے۔

خیال رہے کہ گزشتہ روز ملک بھر سے 121 افراد کو حفاظتی تحویل میں لے لیا گیا، صوبائی حکومتوں کی جانب سے 182 مدارس اور 34 اسکول و کالجز کا کنٹرول سنبھال لیا گیا جبکہ 5 اسپتال، 163 ڈسپنسری، 184 ایمبولینس اور 8 دفتر بھی تحویل میں لے لیے گئے۔

سندھ حکومت نے بھی صوبے کے 56 مدارس اور اسکول تحویل میں لے لیے، مدارس اور اسکول فلاحی انسانیت فاونڈیشن اور جماعت الدعوة کے زیر انتظام تھے۔ اسکولوں و مدارس کو محکمہ اوقاف کی 6 رکنی کمیٹی کی تحویل میں دیا گیا ہے۔

دوسری جانب ترجمان وزارت داخلہ کا کہنا ہے کہ کالعدم تنظیموں کے خلاف آپریشن جاری رہے گا، صوبوں کے ساتھ وزارت داخلہ مل کر کام کر رہی ہے۔

Comments

comments

یہ بھی پڑھیں