پیپلزپارٹی نے این اے 249 میں دوبارہ گنتی کے الیکشن کمیشن کے فیصلےکا خیرمقدم کرتے ہوئے کہا ہے کہ امید ہے دوبارہ گنتی میں تیر کی جیت پر دل بڑا کر کےمبارکباد دی جائےگی۔
پی پی رہنما فیصل کریم کنڈی کا کہنا ہے کہ ضمنی الیکشن میں ناکامی پرفوج کومداخلت کی دعوت دیناافسوسناک تھا اگردھاندلی ہوئی توپولنگ کےدوران الیکشن کمیشن کوشکایت کیوں نہ کی، یہ کیسی دھاندلی ہےجواپنی شکست واضح ہونے پر سامنےآئی۔
فیصل کریم کنڈی نے کہا کہ دھاندلی کےثبوت کےبغیرالیکشن کمیشن کادوبارہ گنتی کا فیصلہ حیران کن ہے۔
الیکشن کمیشن نے نون لیگی امیدوار مفتاح اسماعیل کی جانب سے حلقہ این اے 249 میں ووٹوں کی دوبارہ گنتی سے متعلق درخواست پر فیصلہ سنایا ہے۔
ترجمان مسلم لیگ (ن) مریم اورنگزیب نے الیکشن کمیشن کی جانب سے این اے 249 میں دوبارہ گنتی سے متعلق فیصلے کا خیر مقدم کرتے ہوئے کہا کہ فیصلے پر اللہ تعالیٰ کا شکر ادا کرتے ہیں، اپیل اور ہمیں سننےکے بعد الیکشن کمیشن نےدوبارہ گنتی کافیصلہ کیا، ہمیں امید ہے کہ دوبارہ گنتی ہوگی توہم ہی کامیاب ہونگے۔
واضح رہے کہ تیس اپریل کو شہر قائد میں انتخابی حلقے این اے 249 کا ضمنی انتخاب کا میدان پاکستان پیپلز پارٹی نے اپنے نام کیا تھا، غیر حتمی نتائج کے مطابق پیپلز پارٹی کے قادر خان مندو خیل 16 ہزار 156 ووٹ لے کر کامیاب قرار پائے تھے، مسلم لیگ (ن) کے مفتاح اسماعیل 15 ہزار 473 ووٹ لے کر دوسرے نمبر پر رہے، جب کہ کالعدم تحریک لبیک پاکستان کے مفتی نذیر 11 ہزار 125 ووٹ لے کر تیسرے نمبر پر رہے تھے۔