اسلام آباد: سیاسی رہنما نبیل گبول عمران خان کی حمایت میں بنی گالا پہنچ گئے، ان کا کہنا ہے کہ یہ وقت گھروں میں بیٹھنے کا نہیں، ملک بچانے کے لیے عوام گھروں سے باہر نکل آئیں عمران خان کے ساتھ پہاڑ بھی عبور کرکے اسلام آباد جائوں گا۔
بنی گالہ کے باہر میڈیا سے گفتگو میں انہوں نے کہا کہ سارے پاکستانی گھروں سے باہر نکل آئیں، یہ وقت گھروں میں بیٹھنے کا نہیں ہے، میں پاکستان تحریک انصاف کے ساتھ ہوں، سب کچھ برداشت ہے لیکن قومی سلامتی پر آنچ برداشت نہیں۔
انہوں نے کہا کہ عمران خان کے ساتھ پہاڑ عبور کرکے جاؤں گا، پاکستان کی سالمیت کا سوال ہے، حکمرانوں کو گھر بھیجنا ہے، فی الحال کچھ نہیں کہ سکتا کہ آئندہ کس جماعت میں شامل ہوں گا۔
پرویز رشید کے متعلق انہوں نے کہا کہ پرویز رشید چھوٹا بکرا تھا جس کی قربانی دے کر بڑے بکروں کو بچایا جارہا ہے۔
نبیل گبول کا مزید کہنا تھا کہ میں لاکھوں لوگوں کو لانے کادعوی نہیں کر سکتا لیکن میرے ساتھ چند ہزار لوگ ضرور آئیں گے جو کل کینٹ اسٹیشن پر آپ کو نظر آجائیں گے،
بنی گالہ تک بآسانی پہنچ جانے کے حوالے سے پوچھے گئے سوال کے جواب میں نبیل گبول نے کہا کہ میں آسانی کے ساتھ بنی گالا اس لیے پہنچ گیا کہ میں لیاری کا لیڈر ہوں اور رکاوٹیں کیسے عبور کی جاتی ہیں اچھی طرح جانتا ہوں۔
