لاہور: نجم سیٹھی مینجمنٹ کمیٹی کا عہدہ ملنے کے بعد پی سی بی ہیڈکوارٹر قذافی اسٹیڈیم پہنچ گئے۔
اے آر وائی نیوز کے مطابق قذافی اسٹیڈیم کے باہر موجود حامیوں نے نجم سیٹھی کا استقبال کیا، ان کے ہمراہ بورڈ آف گورننگ ممبر شکیل شیخ ،نعمان بٹ بھی ہے۔
قذافی اسٹیڈیم کے باہر نجم سیٹھی کو ہار پہنائے اور پھول نچھاور کئےگئے، اس دوران پی سی بی مینجمنٹ کمیٹی کے نئے چیئرمین نجم سیٹھی نے میڈیا سے گفتگو کرتے ہوئے کہا کہ 4سال بعد آیا ہوں بہت کام کرنا ہے۔
پی سی بی کے مینجمنٹ کمیٹی کے چیئرمین کا کہنا تھا کہ پی ایس ایل بہت بڑا برانڈ ہے، ہمارے دور میں پی ایس ایل شروع ہوا، ٹیم کا اعلان نہیں ہوا ہوتا تو شاید نئی چیزیں ہم اس میں شامل کرتے۔
نجم سیٹھی نے کہا کہ ہم ملک میں انٹرنیشنل کرکٹ واپس لیکر آئیں گے، نیوزی لینڈ کی ٹیم آئی ہے یہ اہم دورہ ہے، کوشش ہے دو ٹیسٹ اچھے ماحول میں ہوں گے۔
انہوں نے کہا کہ امید ہے ہماری کارکردگی اچھی ہوگی، پاک بھارت میچز کے حوالے سے انہوں نے کہا کہ مجھے نہیں پتہ پہلے سے کیا فیصلے ہوچکے ہیں، بھارت کاجب معاملہ آتا ہےتو حکومت کی رائے لیتی پڑتی ہے۔
پی سی بی مینجمنٹ کمیٹی کے نئے چیئرمین نجم سیٹھی کا مزید کہنا تھا کہ پشاور میں اسٹیڈیم تیار ہورہا ہے، پشاور میں اسٹیڈیم تیار ہوگا تو ہم جائیں گے اورکھیلیں گے۔
