کراچی : شہر قائد کے مختلف علاقوں میں موجود قدیم عمارتیں اور مساجد ایسی ہیں جوتاریخ کاحصہ بن چکی ہیں جہاں سے آج بھی شہری قلبی اور روحانی سکون حاصل کرتے ہیں انہی مساجد میں سے ایک کراچی کے ایم اے جناح روڈپر واقع نیو میمن مسجد بھی ہے۔
بولٹن مارکیٹ میں واقع نیو میمن مسجد کا شمار کراچی کی صف اول کی مساجد میں شامل ہوتا ہے اور یہاں ایک وقت میں دس ہزار تک نمازی سما سکتے ہیں
ایم اے جناح روڈ پر واقع نیو میمن مسجد قیام پاکستان کے دوسال بعد تعمیر کی گئی تھی۔ اس کا سنگ بنیاد 24 اگست 1949کو رکھا گیا ، اس تاریخی مسجد میں پہلی اذان 15جولائی 1949میں دی گئی تھی۔
مسجد کے17820مربع گز احاطے میں دس ہزار نمازیوں کی گنجائش ہے جبکہ دو میناروں کے درمیان 70فٹ اونچا گنبد اور وضو کے لئے بنائے گئے دوحوض اسلامی ثقافت کی عکاسی کرتے نظر آتے ہیں۔
عام دنوں کے علاوہ بالخصوص رمضان المبارک میں دکانداروں اورروزے داروں کی بڑی تعداد میمن مسجد میں عبادات میں مشغول ہوکرقلبی اورروحانی سکون حاصل کرتے ہیں، رمضان کے دوران یہاں ہر روز کئی ہزارافراد کے لئے مفت افطاری کا انتظار کیا جاتا ہے۔
نیو میمن مسجد میں بالخصوص ماہ صیام میں خصوصی درس وتدریس کا اہتمام کیاجاتاہے، جس میں اسلامی تعلیمات انبیاء اور صحابہ کرام کے واقعات اور ان کی زندگیوں پرروشنی ڈالی جاتی ہے۔
