اسلام آباد : حکومت نے بجلی بلوں میں ریلیف کا نیا پلان آئی ایم ایف کو ارسال کردیا ، بجلی بلوں میں ریلیف دینے کیلئے آئی پی پیز کے 15 ارب سے زائد استعمال کرنے کا فیصلہ کیا گیا ہے۔
تفصیلات کے مطابق پاکستان نے آئی ایم ایف سے بجلی کے بلوں کے ریلیف کے لیے رابطہ کیا، ذرائع نے بتایا کہ بجلی بلوں میں ریلیف دینے کیلئے آئی پی پیز کے 15 ارب سے زائد استعمال کرنے کا فیصلہ کیا گیا ہے، آئی پی پیز کیلئےرقم الگ سے بجٹ میں رکھی گئی ہے۔
ذرائع وزارت خزانہ کا کہنا ہے کہ وزارت خزانہ کی جانب سے بجلی بلوں میں ریلیف کا نیا پلان آئی ایم ایف کو ارسال کردیا گیا ہے۔
رواں مالی سال کیلئے آئی پی پیز کو ادائیگیوں کیلئے 15 ارب سے زائد اضافی رکھے گئے تھے، آئی پی پیز کیلئے مختص اضافی رقم کو بجلی بلوں میں ریلیف دینے کیلئے ایڈجسٹ کیا جا سکتا ہے۔
ذرائع کا کہنا ہے کہ بل سے اقساط وصول ہونے پر 15 ارب سے زائد کی یہ رقم واپس آئی پی پیز کیلئے مختص کی جائے گی۔
آئی ایم ایف کے ساتھ نئے پلان پر وزارت خزانہ حکام دوبارہ بات کریں گے، نئے پلان میں آئی ایم ایف کو بجٹ سے آؤٹ ریلیف نہ دینے کی یقین دہانی کرائی گئی ہے۔
