اسلام آباد میں پاکستان تحریک انصاف کے جلسے کا این اوسی معطل کر دیا گیا۔
تفصیلات کے مطابق چیف کمشنر اسلام آباد کی زیرصدرات محرم الحرام میں سیکیورٹی سے متعلق اجلاس ہوا جس میں سیکیورٹی اداروں کے افسران نے بھی شرکت کی۔
ایک سیاسی جماعت دعوت کے باوجود اجلاس میں شریک نہ ہوئی۔ اجلاس میں جلسے سے متعلق درخواستوں کا بھی جائزہ لیا گیا۔ ڈی سی کی جانب سے اجازت کا سیکیورٹی خدشات کے تناظر میں ازسرنو جائزہ لیا گیا۔
چیف کمشنر نے سیکیورٹی خدشات اور سفارشات پر جلسے کا این اوسی معطل کر دیا۔ انتظامیہ کا کہنا ہے کہ جلسے کے این اوسی کی معطلی کا فیصلہ شہریوں کے تحفظ کیلئے کیا گیا اسلام آباد میں امن عامہ کو برقرار رکھنا اور شہریوں کا تحفظ ترجیح ہے۔
قبل ازیں اسلام آبادمیں ترنول کے مقام پر پی ٹی آئی قیادت کی جانب سے جلسہ گاہ کے انتظامات کا جائزہ لیا گیا۔ شیخ وقاص اکرم، شعیب شاہین، رؤف حسن، شہریار ریاض نےجلسہ گاہ کا دورہ کیا۔
