لاہور : پنجاب حکومت کے اسسٹنٹ کمشنرز، ایڈیشنل کمشنرز ودیگر افسران کو نئی گاڑیاں دینے کا نوٹیفکیشن چیلنج کردیا گیا۔
تفصیلات کے مطابق لاہور ہائیکورٹ میں پنجاب حکومت کے اسسٹنٹ کمشنرز، ایڈیشنل کمشنرز ودیگر افسران کو نئی گاڑیاں دینے کے نوٹیفکیشن کیخلاف درخواست دائر کردی۔
درخواست شیراز الطاف کی وساطت سے مدثر چوہدری ایڈووکیٹ نے دائر کی ، درخواست میں نگران پنجاب حکومت سمیت دیگر کو فریق بنایا گیا ہے۔
درخواست میں کہا گیا کہ عوامی پیسہ عوام کی فلاح وبہبود پر استعمال کیا جائے، معاشی طور پر ملک کی حالت نازک ہے ، معیشت مستحکم ہونے کے بعد ایسی مراعات دی جائے۔
درخواست گزار کا کہنا تھا کہ نگران حکومت صرف روز مرہ کے معمول چلا سکتی ہے، نگران حکومت کے پاس عوامی مینڈیٹ نہیں وہ پبلک فنڈز کو استعمال نہیں کرسکتی۔
درخواست میں استدعا کی گئی کہ عدالت افسران کے لیے نئی گاڑیوں کی خریداری کا نوٹیفکیشن کالعدم قرار دے۔
