کراچی: عدالت نے کراچی کی اہم فوڈ اسٹریٹ برنس روڈ کی بندش کے ضلعی انتظامیہ کے دونوں نوٹیفکیشن کالعدم قرار دے دیے۔
تفصیلات کے مطابق سندھ ہائی کورٹ نے برنس روڈ پر فوڈ اسٹریٹ سے متعلق تحریری حکم نامہ جاری کر دیا، برنس روڈ کی بندش کے ضلعی انتظامیہ کے دونوں نوٹیفکیشن کالعدم قرار دے دیے گئے۔
عدالت نے 3 روز میں برنس روڈ کی سڑکیں بحال کرنے کا حکم دے دیا ہے، حکم نامے میں کہا گیا کہ برنس روڈ اور اطراف کی سڑکوں کو اصل شکل میں بحال کریں۔
تحریری فیصلے میں کہا گیا ہے کہ برنس روڈ سے تمام تر کرسیاں، میزیں اور تجاوزات ہٹائی جائیں، اور روڈ کو عام ٹریفک کے لیے مکمل طور پر بحال کیا جائے۔
ضلعی انتظامیہ کو 7 روز میں عمل درآمد رپورٹ پیش کرنے کی ہدایت بھی کر دی گئی ہے۔
عدالت نے اپنے فیصلے میں کہا کہ ڈپٹی کمشنر جنوبی سڑک کو بند کرنے کی کوئی وضاحت نہ دے سکے، متعلقہ اتھارٹی کے بغیر نوٹیفکیشن کا اجرا غیر قانونی ہے۔
