ایم کیو ایم پاکستان نے اعلیٰ تعلیم یافتہ اور کم عمر نوجوانوں کو اسمبلی میں پہنچا کر نئی روایت رقم کر دی اب سندھ کے ایوان میں پی ایچ ڈی ہولڈرز اور انجینئرز بھی نظر آئیں گے۔
اے آر وائی نیوز کے مطابق سندھ کا ایوان پہلی بار انجینئیرز، پی ایچ ڈی ہولڈرز اور اعلیٰ تعلیم یافتہ نوجوانوں کی عوامی مسائل کے حل کے لیے تقاریر سے گونجے گا۔ ایم کیو ایم نے 25 سالہ ماسٹر ڈگری ہولڈر معاذ محبوب کو ایوان بھیج کر نئی روایت قائم کی ہے۔
انجینئر اور ڈبل ماسٹرز ڈگری ہولڈر عادل عسکری بھی ایوان میں نوجوانوں کی نمائندگی کریں گے، عادل عسکری نے تو عوام کے مسائل کے حل کے لیے ویب ایپلی کیشن بھی بنا ڈالی۔
بیرون ملک سے تعلیم یافتہ اور علمی شعبے سے تعلق رکھنے والےعبدالباسط پی ایچ ڈی ہولڈر ہیں، ان کا عزم نوجوانوں کو تعلیمی میدان اور ان کے لیے روزگار کے مواقع پیدا کرنا ہے۔
سیاسی تجزیہ نگاروں کا کہنا ہے کہ ایم کیو ایم نے ایوان میں پندرہ سے زائد نوجوان چہروں کو متعارف کرا کر سندھ کی پارلیمانی سیاست میں نئی روایت کی بنیاد ڈالی ہے۔
