ٹوکیو : جاپان میں جان لیوا نئے وائرس نے ایک خاتون کو موت کی نیند سلا دیا، متاثرہ خاتون چند دن اسپتال میں رہنے کے بعد چل بسی۔
نیشنل انسٹی ٹیوٹ آف انفیکٹیو ڈیزیز(این آئی آئی ڈی) اور وزارت صحت، محنت اور بہبود کی طرف سے جاری کردہ ایک رپورٹ کے مطابق ٹوکیو کی رہائشی ایک 70سالہ خاتون گزشتہ سال اوز وائرس سے متاثر ہوئی تھی جس نے کبھی بیرون ملک سفر بھی نہیں کیا تھا بلکہ اسے ہائی بلڈ پریشر سمیت بنیادی بیماریاں لاحق تھیں۔
غیر ملکی خبر رساں ادارے کی رپورٹ کے مطابق متاثرہ خاتون کو گزشتہ موسم گرما میں بخار، تھکاوٹ اور جوڑوں میں درد کے باعث اسپتال داخل کرانا پڑا جس کے ٹیسٹوں کے بعد اسے نمونیا کی تشخیص ہوئی جب مریضہ کا معائنہ کیا گیا تو معلوم ہوا کہ اس کی دائیں ران پر ایک ’ٹک‘(خون چوسنے والا کیڑا) خون چوستا ہوا پایا گیا۔ تاہم اسپتال میں داخل ہونے کے 26 دن بعد دل کی سوزش مایوکارڈائٹس کی علامات کی وجہ سے اس کی موت واقع ہوگئی۔
مایوکارڈائٹس کیا ہے؟
مایوکارڈائٹس ایک سنگین جسمانی حالت کا نام ہے جہاں دل کی دیوار کے درمیانی پٹھوں کی تہہ میں سوزش پیدا ہوتی ہے۔ مایوکارڈائٹس دل اور اس کے برقی نظام کو کمزور کرسکتا ہے۔ اس کے نتیجے میں، دل کی خون پمپ کرنے کی صلاحیت کم ہو جاتی ہے۔
انسٹی ٹیوٹ حکام نے بتایا کہ اوز وائرس ’ٹک‘ کے کاٹنے سے پھیلتا ہے، اس کی نسل جاپان کے علاقے میں موجود ہے۔ وزارت صحت کے مطابق جاپان سے باہر ابھی تک اس وائرس کا پتہ نہیں چلا ہے۔ انہوں نے کہا کہ جہاں پر ’ٹک‘ پائے جاتے ہیں وہاں انسان کو اپنے پورے جسم کو ڈھک کر جانا چاہیے۔ اگرکسی جسم پر ’ٹک‘ چپک جائے تو فوراً ڈاکٹر سے رابطہ کیا جائے۔
این آئی آئی ڈی کے مطابق، یہ وائرس، پہلی بار 2018 میں ایہائم کے مغربی پریفیکچر میں پائے جانے والے ایمبلی اوما ٹیسٹڈنیریم ٹک میں پایا گیا تھا، ضروری نہیں کہ یہ مہلک ہو، لیکن اس کی علامات اور خطرات کا تعین کرنے کے لیے مزید مطالعات کی ضرورت ہے۔
