اتوار, جون 8, 2025
لائیو سٹریم
اے آر وائی نیوز انگریزی
رمضان کیلنڈر 2025
گولڈ ریٹس
کرنسی ریٹ
ایندھن قیمتیں
ہوم بلاگ صفحہ 10

‘پاکستان کی کرپٹو اور ڈیجیٹل اثاثوں میں کامیابیوں سے بھارت پریشان’

کی طرف
ویب ڈیسک
-
0
بلال بن ثاقب

واشنگٹن : وزیرمملکت برائے کرپٹو اور ڈیجیٹل اثاثہ جات بلال بن ثاقب کا کہنا ہے کہ پاکستان کی کرپٹو اور ڈیجیٹل اثاثوں میں کامیابیوں سے بھارت پریشان ہے۔

تفصیلات کے مطابق وزیرمملکت برائے کرپٹو اور ڈیجیٹل اثاثہ جات بلال بن ثاقب کی امریکا میں مصروفیات جاری ہے۔

بلال بن ثاقب نے پاکستان کی کرپٹو اور ڈیجیٹل اثاثہ جات کی کوششوں سےآگاہ کیا، انھوں نے لاس ویگس میں بٹ کوائن کانفرنس میں پاکستان کی حکمت عملی سے آگاہ کیا۔

وزیرمملکت برائے کرپٹو نے کہا کہ پاکستان بٹ کوائن کے سلسلے میں سرفہرست ملکوں میں شامل ہونےپر گامزن ہے، کرپٹو اور ڈیجیٹل اثاثہ جات میں پاکستان کی آئے روز کامیابیوں سے بھارت پریشان ہے۔

مزید پڑھیں : پاکستان کا بٹ کوائن ریزرو کا اعلان، بھارت کی نیندیں اُڑ گئیں

ان کا کہنا تھا کہ پاکستان کرپٹواورڈیجیٹل اثاثہ جات کےمعاملےمیں نئی کامیابیاں حاصل کر رہاہے، پاکستان بٹ کوائن کے ذخائر قائم کرنے والا پہلا ایشیائی ملک بننا چاہتا ہے۔

وزیرمملکت نے مزید بتایا کہ بٹ کوائن ذخائر کیلئے انفرا اسٹرکچر کرپٹو مائننگ اور اے آئی کا ڈیٹا زون قائم کرناچاہتے ہیں۔

انھوں نے کہا کہ پاکستان کرپٹوکونسل کےقیام سے محض 3 ماہ میں بٹ کوائن ذخائر سےبھارت تلملااٹھا، بھارت نے کئی سال سے کرپٹو پر صرف ایک ڈسکشن پیپر ہی تیار کیا ہے۔

ایلون مسک کو ٹرمپ کے خلاف ٹوئٹ کرنا مہنگا پڑ گیا

کی طرف
ویب ڈیسک
-
0

امریکی صدر ڈونلڈ ٹرمپ کیساتھ اختلافات امریکی کمپنی ٹیسلا کے بانی ایلون مسک کو مہنگے پڑگئے۔

غیر ملکی میڈیا رپورٹ کے مطابق عالمی مارکیٹ میں ٹیسلا کے شئیر پندرہ فیصد گر گئے، مسک کی کمپنی کو ایک دن میں ایک سو باون ارب ڈالر کا خسارہ ہوگیا۔

ایکس پر ایلون مسک نے ٹرمپ پر سنگین الزامات عائد کیے تھے انہوں نے کہا تھا کہ چار ٹریلین ڈالر بگ بیوٹی بل کبھی نہیں دکھایا گیا، بل عجلت میں منظور کیا گیا کہ ارکان بھی نہ پڑھ سکے، اب بڑے انکشاف کا وقت آگیا ہے۔

ایلون مسک نے ٹوئٹ میں لکھا تھا کہ اصل ڈونلڈٹرمپ ایپسٹین کی فائلوں میں موجود ہے، ٹرمپ انتظامیہ اسلیے جیفری ایپسٹین فائلز پبلک نہیں کررہی، سچ ایک دن ضرور سامنے آئے گا۔

ٹرمپ اور مسک کی دوستی دشمنی میں بدل گئی، سنگین الزامات کا تبادلہ

ایلون مسک نے کہا تھا کہ میرے بغیر صدر ڈونلڈ ٹرمپ الیکشن ہار جاتے، اور ڈیموکریٹس کو ایوان میں کنٹرول مل جاتا۔

دوسری جانب امریکی صدر ٹرمپ نے کہا کہ ایلون مسک کی تنقید سے بہت مایوسی ہوئی ہے، ایلون مسک بل کے معاملات سے بخوبی واقف تھے، ساتھ ہی ٹرمپ نے ایلون مسک کے اربوں ڈالر کے سرکاری معاہدے منسوخ کرنے کی دھمکی بھی دیدی۔

پاکستان میں بوہری برادری آج عید الاضحیٰ منا رہی ہے

کی طرف
ویب ڈیسک
-
0

کراچی : پاکستان میں بوہری برادری آج عید الاضحیٰ منا رہی ہے اور سنت ابراہیمی کی ادائیگی کا سلسلہ جاری ہے۔

تفصیلات کے مطابق ملک بھر کی طرح کراچی میں بھی بوہری برادری عید الاضحی مذہبی جوش و خروش اور عقیدت و احترام کے ساتھ منا رہی ہے۔

کراچی میں نمازعید کا سب سے بڑا اجتماع صدر کی طاہری مسجد میں ہوا، داوٴدی بوہرہ جماعت کے تحت عید الاضحی کی نماز کے اجتماعات طاہری مسجد صدر‘ پاکستان چوک‘ حیدری ‘بلوچ کالونی ،سٹی کورٹ سمیت شہر کے مختلف مقامات پر ہوئے۔

اس موقع پر سیکیورٹی کے بھر پور انتظامات کئے گئے تھے، عید الاضحی کے اجتماع میں میں اسلام کی سربلندی اور ملک کی سلامتی کے لئے خصوصی دعائیں مانگی گئیں۔

نماز عید کے بعد حضرت ابراہیم علیہ السلام کی سنت کی اتباع کرتے ہوئے مویشیوں کی قربانی کی جارہی ہے۔

خیال رہے سعودی عرب اور متحدہ عرب امارات سمیت مختلف ملکوں میں آج عید الضحی منائی جا رہی ہے۔

مسجدالحرام اورمسجدِ نبوی میں نمازعید کےروح پرور اجتماعات ہوئے جبکہ مسجد اقصی میں بھی عیدکی نمازادا کی گئی۔

امریکا، برطانیہ، یورپ اور کینیڈا میں اس بار بھی دو عیدالاضحیٰ منائی جارہی ہے، کچھ مسلمان آج عید منا رہے ہیں اور کچھ کل منائیں گے۔

وزیراعظم شہباز شریف نے عمرہ کی سعادت حاصل کرلی

کی طرف
ویب ڈیسک
-
0
شہباز شریف نے عمرہ کی سعادت

مکہ مکرمہ : وزیراعظم شہباز شریف نے عمرہ کی سعادت حاصل کرلی، اس موقع پر انھوں نے ملکی ترقی، خوشحالی، امت مسلمہ اور غزہ کےلئے دعائیں کی گئیں۔

تفصیلات کے مطابق وزیراعظم شہبازشریف عمرہ ادائیگی کے لیے وفد کے ساتھ مکہ مکرمہ پہنچے، نائب وزیراعظم اسحاق ڈار،فیلڈ مارشل سیدعاصم منیر بھی ہمراہ ہیں۔

وزیراعظم نے مکہ مکرمہ میں اپنے وفد کے ہمراہ عمرہ ادا کیا اور خانہ کعبہ میں نوافل ادا کیے، اس موقع پر وزیراعظم نے ملکی ترقی، خوشحالی، امت مسلمہ اور غزہ کےلئے دعائیں کی گئیں۔

اس سے پہلے جدہ ائیرپورٹ پر وزیراعظم اور ان کے وفد کا گورنرجدہ اور دیگر سعودی حکام نے پرتپاک استقبال کیا۔

دورہ سعودی عرب کے دوران وزیراعظم شہباز شریف ولی عہد محمد بن سلمان سے ملاقات کریں گے، تجارت، سرمایہ کاری،مسلم امہ کی فلاح،علاقائی استحکام پرگفتگو ہوگی، علاقائی امن وسلامتی کے امورپربھی تبادلہ خیال کیا جائےگا۔

وزیراعظم حالیہ پاک بھارت کشیدگی میں کمی کے لیےکردار ادا کرنے پر سعودی عرب کا شکریہ ادا کریں گے۔

حجاج کرام آج بڑے شیطان کی رمی کر رہے ہیں

کی طرف
ویب ڈیسک
-
0

مزدلفہ میں رات کھلے آسمان تلے گزارنے کے بعد حجاج کرام بڑے شیطان کو کنکریاں مارنے منیٰ پہنچ گئے ہیں اور رمی کا آغاز ہوگیا ہے۔

حج کا رکن اعظم وقوف عرفات گزشتہ روز ادا کر دیا گیا۔ حجاج کرام نے کل میدان عرفات میں رکن اعظم کی ادائیگی کے بعد مزدلفہ کا رخ کیا جہاں رات کھلے آسمان تلے اللہ تعالیٰ کی عبادات اور مناجات کرتے ہوئے گزاری۔

آج حجاج کرام بڑے شیطان کو کنکریاں (رمی) ماریں گے جس کے لیے وہ منیٰ پہنچنا شروع ہوگئے ہیں اور رمی کا آغاز ہوگیا ہے۔

بڑے شیطان کو کنکریاں مارنے کے بعد حجاج جانوروں کی قربانی کر کے سر منڈوائیں گے اور احرام کھول دیں گے۔

حجاج کرام طواف زیارت اور سعی کرنے کے بعد منیٰ لوٹ آئیں گے، جہاں وہ مزید دو دن قیام کے دوران رمی بھی کریں گے، حجاج کرام 12 ذی الحج کو مغرب سے قبل وادی منیٰ سے نکل جائیں گے اور یوں ان کا حج کے فریضے کا عمل مکمل ہو جائے گا۔

سینیٹر عباس آفریدی زخموں کی تاب نہ لاتے ہوئے چل بسے

کی طرف
ویب ڈیسک
-
0
سینیٹر عباس آفریدی زخموں کی تاب نہ لاتے ہوئے چل بسے

کوہاٹ: سابق سینیٹر عباس آفریدی کھاریاں میں گیس لیکیج کے دھماکے میں زخمی ہونے کے بعد زخموں کی تاب نہ لاتے ہوئے انتقال کرگئے۔

تفصیلات کے مطابق گزشتہ روز عباس آفریدی کے حجرے میں گیس لیکیج کے باعث دھماکا ہوا تھا جس کے نتیجے میں وہ اور ان کے ساتھ تین ساتھی زخمی ہوگئے تھے۔

عباس آفریدی کے بھتیجے حسین آفریدی نے تصدیق کی کہ کھاریاں کے برن اسپتال  میں وہ زیر علاج تھے تاہم اب ان کا انتقال ہوگیا ہے، عباس آفریدی کی نماز  جنازہ کا اعلان بعد میں کیا جائے گا۔

واضح رہے کہ عباس آفریدی مارچ 2009 میں آزاد امیدوار کے طور پر سینیٹ آف پاکستان کے لیے منتخب ہوئے تھے۔ انہوں نے 19 مارچ 2014 کو وفاقی وزیر برائے ٹیکسٹائل انڈسٹری کے عہدے کا حلف اٹھایا۔

ٹرمپ اور مسک کی دوستی دشمنی میں بدل گئی، سنگین الزامات کا تبادلہ

کی طرف
ویب ڈیسک
-
0

امریکی صدر ٹرمپ اور امریکی کمپنی ٹیسلااور امریکا کے محکمہ برائے حکومتی کارکردگی (DOGE)کے سابق سربراہ ایلون مسک کی دوستی دشمنی میں بدل گئی۔

غیر ملکی میڈیا رپورٹ کے مطابق ایلون مسک نے اپنا عہدہ چھوڑنے کے بعد امریکی صدرکے ٹیکس میں کٹوتی اور اخراجات بل پر شدید تنقید کی تھی۔

تاہم اب ایلون مسک نے ٹرمپ پر سنگین الزامات لگائے اور مواخذے کا مطالبہ کردیا جبکہ ٹرمپ نے ایلون مسک کو پاگل قراردیے ہوئے سرکاری معاہدے ختم کرنے کی دھمکی دیدی۔

ایکس اور ٹروتھ سوشل پر دونوں کے ایک دوسرے پر لفظی گولہ باری جاری ہے، ایلون مسک نے ایکس پر لکھا اب بڑے انکشاف کا وقت آگیا ہے، اصل ڈونلڈ ٹرمپ ایپسٹین کی فائلوں میں موجود ہے، ٹرمپ انتظامیہ اسی لیے جنسی اسکینڈلز کیلئے بدنام جیفری ایپسٹین فائلز پبلک نہیں کررہی، یاد رکھیں، سچ ایک دن ضرور سامنے  آئے گا۔

ایلون مسک نے مزید کہا کہ ان کے بغیر صدر ڈونلڈ ٹرمپ الیکشن ہار جاتے اور ڈیموکریٹس کو ایوان میں کنٹرول مل جاتا۔

جس پر صدرٹرمپ نے جواب میں کہا کہ ایلون مسک کی تنقید سے بہت مایوسی ہوئی ہے، ایلون مسک بل کے معاملات سے بخوبی واقف تھے، جس پر ایلون مسک نے کہا کہ چار ٹریلین ڈالر بگ بیوٹی بل کبھی نہیں دکھایا گیا، بل عجلت میں منظور کیا گیا کہ ارکان بھی نہ پڑھ سکے۔

ٹرمپ انتظامیہ ٹیرف رواں سال کی دوسری ششماہی میں کساد بازاری لائے گا، جس پر صدر ٹرمپ نے ایلون مسک کو کمپنیوں کو حاصل سبسڈی ختم کرنے کی دھمکی دیتے ہوئے کہا مسک کی سبسڈیز اور سرکاری معاہدے ختم کرنے سے اربوں ڈالرز بچائے جاسکتے ہیں، ہمیشہ حیران رہتا تھا کہ بائیڈن نے ایسا  کیوں نہیں کیا۔

دوسری جان ایلون مسک نے امریکا میں نئی سیاسی جماعت بنانے کیلئے ایکس پر رائے مانگ لی، کہا کیا اب وقت آگیا ہے کہ امریکہ میں ایک نئی سیاسی جماعت بنائی جائے؟۔ایسی نئی سیاسی جماعت  جو حقیقت میں اسی فیصد عوام کی نمائندگی کرے۔

ٹرمپ نے نیتن یاہو کے خلاف فیصلہ دینے والی 4 خواتین ججز پر پابندیاں عائد کر دیں

کی طرف
ویب ڈیسک
-
0
ٹرمپ نے نیتن یاہو کے خلاف فیصلہ دینے والی 4 خواتین ججز پر پابندیاں عائد کر دیں

امریکی صدر ڈونلڈ ٹرمپ کی انتظامیہ نے اسرائیلی وزیر اعظم نیتن یاہو کے خلاف وارنٹ گرفتاری جاری کرنے والی عالمی فوجداری عدالت (آئی سی سی) کی 4 خواتین ججوں پر پابندیاں عائد کر دی ہیں۔

امریکی میڈیا کے مطابق ججز پر پابندیاں اسرائیلی وزیراعظم نیتن یاہو کے وارنٹ گرفتاری جاری کرنےکا ردعمل ہے، جن ججز پر پابندیاں لگائی گئیں ان میں دو ججز، بیٹی ہوہلر جن کا تعلق سلووینیا اور دوسری رینی الاپینی جن کا تعلق بینن سے ہے۔

یہ ججز اُن عدالتی کارروائیوں کا حصہ تھیں جن کے نتیجے میں اسرائیلی وزیرِ اعظم نیتن یاہو کے گرفتاری کے وارنٹ جاری کیے گئے تھے، دیگر دوججز میں شامل لوز ڈیل کارمین، جن کا تعلق پیرو اور سولومی بالنگی بوسا کا تعلق یوگنڈا سے ہے۔

وارنٹ گرفتاری کے باوجود فرانس نے نیتن یاہو کے طیارے کو گزرنے کی اجازت دیدی

رپورٹ کے مطابق پابندیوں کے تحت ان ججز کو امریکا میں داخلے کی اجازت نہیں دی جائے گی اور ان کے امریکا میں موجود تمام اثاثے منجمد کر دیے جائیں گے، عالمی فوجداری عدالت کا کہنا ہے کہ وہ ججوں اور عدالتی عملے کے ساتھ ہیں۔

واضح رہے کہ 21 نومبر کو عالمی فوجداری عدالت نے اسرائیلی وزیر اعظم بنیامین نیتن یاہو کے وارنٹ گرفتاری جاری کیے تھے، عدالت نے فلسطینی مزاحمتی تنظیم حماس کے عسکری ونگ القسام بریگیڈز کے سربراہ محمد ضیف کے بھی وارنٹ گرفتاری جاری کیے ہیں۔

کورنگی سے گرفتار ملزمان اسٹریٹ کرائم کی درجنوں وارداتوں میں ملوث نکلے

کی طرف
نذیر شاہ
-
0
کورنگی سے گرفتار ملزمان اسٹریٹ کرائم کی درجنوں وارداتوں میں ملوث نکلے

کراچی: کورنگی انڈسٹریل ایریا پولیس سے مبینہ مقابلے میں گرفتار تین ملزمان جرائم کی درجنوں ورداتوں میں ملوث نکلے۔

  تفصیلات کے مطابق کورنگی سیکٹر سیون اے سے انڈسٹریل ایریا میں پولیس نے مبینہ مقابلے کے بعد دو زخمیوں سمیت تین ملزمان کو گرفتار کیا تھا۔

ایس ایس پی کورنگی طارق نواز کے مطابق گرفتار ملزمان اسٹریٹ کرائم کی درجنوں وارداتوں میں ملوث نکلے ہیں، مجموعی طور پر تینوں ملزمان کے خلاف مختلف تھانوں میں 26 مقدمات درج ہیں۔

گرفتار ملزمان میں زخمی راحیل، زخمی اسلم خان اور کاشف خان شامل ہیں ان ملزمان نے دو جون کو شہری سفیان بلوچ کو بھی گودام چورنگی پرلوٹا تھا۔

پولیس کا کہنا ہے کہ شہری سے دو آئی فون کیش اور دیگر سامان چھینا گیا تھا، مقابلے کے بعد ملزمان کے قبضے سے دو پستول موٹرسائیکل چھینے ہوئے موبائل فونز اور گھڑی برآمد ہوئی ہے۔

ملزمان کے سابقہ مجرمانہ ریکارڈ کے مطابق ملزم راحیل کے خلاف مختلف تھانوں میں 9 اسلم کے خلاف 12 جبکہ ملزم کاشف کے خلاف 5 مقدمات درج ہیں، ان گرفتار ملزمان سے مزید تفتیش کا عمل جاری ہے۔

سعودی عرب سمیت دیگر عرب ممالک میں آج عیدالاضحیٰ منائی جارہی ہے

کی طرف
ویب ڈیسک
-
0
سعودی عرب سمیت دیگر عرب ممالک میں آج عیدالاضحیٰ منائی جارہی ہے

ریاض : سعودی عرب، متحدہ عرب امارات سمیت خلیجی ممالک میں آج عیدالاضحی منائی جارہی ہے، مسجد الحرام اور مسجد نبوی میں نماز عید کے بڑے اجتماعات ہوئے۔

تفصیلات کے مطابق سعودی عرب سمیت بعض یورپی ممالک میں عید الاضحیٰ آج منائی جا رہی ہے، مدینہ منورہ اور مکہ مکرمہ میں عیدالاضحیٰ کی نماز ادا کردی گئی، جس میں ہزروں افراد نے نماز عید ادا کی۔

مسجدالحرام میں امام مسجدِ حرم الشیخ ماہر المعیقلی نے نماز عید کی امامت کی اور خطبہ دیا، مسجد اقصی میں بھی عید کی نماز کا اجتماع ہوا، لبنان اور مصر میں بھی عید کے بڑے اجتماعات ہوئے، نماز کے بعد قربانی کی گئی۔

دمشق کی جامع مسجد میں نماز عید کا بڑا اجتماع ہوا، عبوری صدر احمد الشراع بھی شریک ہوئے۔

دوسری جانب مزدلفہ سے حجاج منی پہنچ رہے ہیں جہاں وہ بڑے شیطان کو کنکریاں مار کر قربانی کریں گے اور سرمنڈوا کر احرام کھول دیں گے، حجاج کرام قربانی کے بعد طواف زیارت اور سعی کرینگے۔

اس کے علاوہ یورپ، امریکا سمیت کئی ممالک میں اس بار بھی دو عیدیں منائی جائیں گی، امریکا، برطانیہ، یورپ اور کینیڈا میں مسلم کمیونٹی کے بعض افراد اتوار اور دیگر پیر کو عید منائیں گے۔

متحدہ عرب امارات، دبئی، ابوظبی، شارجہ اور دیگر اماراتی ریاستوں میں بھی نماز عید ادا کردی گئی جبکہ پاکستان میں بوہری  برادری بھی آج عیدالاضحیٰ منارہی ہے۔

کراچی میں بوہری برادری کی مساجد میں نماز عیدالاضحیٰ کی ادائیگی، صدر، پاکستان چوک، حیدری، بلوچ کالونی سمیت دیگر علاقوں میں اجتماعات ہوئے۔

1...91011...30,603صفحہ%موجودہ صفحہ%کا%کل صفحات

سوشل میڈیا

اے آر وائی ڈیجیٹل نیٹ ورک

انٹرایکٹو

کارپوریٹ

کاپی رائٹ © 2025