ڈونلڈ ٹرمپ نے امریکا کے 47 ویں صدر کا حلف اٹھا لیا دوسری بار امریکی صدر بننے پر خوش ٹرمپ نے تلوار اٹھا کر روایتی انداز میں رقص کیا۔

گزشتہ روز واشنگٹن ڈی سی کیپٹل ہل میں 47 ویں امریکی صدر کا حلف اٹھانے کے بعد ٹرمپ کیپٹل ون ایرینا پہنچے، جہاں ان کے اعزاز میں رنگا رنگ پریڈ منعقد ہوئی۔

اس تقریب کے اختتام پر کیک کاٹنے کی تقریب منعقد ہوئی جس کے بعد صدر ٹرمپ نے تلوار اٹھا کر روایتی رقص بھی کیا۔

تقریب میں صدر ٹرمپ، ان کی اہلیہ اور امریکی خاتون اول میلانیا ٹرمپ، نائب صدر نائب صدر جے ڈی وینس اور ان کی اہلیہ بھی موجود تھیں۔

اسٹیج پر ایک بڑا کیک رکھا تھا جس کے اوپر فضا میں اڑان بھرتے جہاز کا ماڈل رکھا گیا تھا۔ کیک کے اطراف امریکی جھنڈے سے ہم آہنگ پھول بنے تھے جب کہ اہم قومی اداروں کے لوگو بھی لگے ہوئے تھے۔

امریکی صدر اور نائب صدر نے تلواروں سے کیک کاٹا جس کے بعد ٹرمپ نے تلوار اٹھا کر روایتی رقص کیا اور ان کے ساتھ کھڑی اہلیہ میلانیا ٹرمپ نے بھی کچھ لمحے ان کا ساتھ دیا۔ تاہم نائب صدر اور ان کی اہلیہ خاموش کھڑے اس رقص سے محظوظ ہوتے رہے۔

امریکی صدر کے ڈانس پر تقریب میں شریک ان کے حامی انتہائی پرجوش نظر آئے۔ بعد ازاں تقریب سے اختتام پر انہوں نے مخصوص انداز میں شائقین کی جانب مکا لہرایا اور اسٹیج پر متعین افسران سے مصافحہ کیا۔

ویڈیو رپورٹ: امریکی صدر ڈونلڈ ٹرمپ کا پہلا دن کیسا گزرا؟

ڈونلڈ ٹرمپ نے دوسری بار امریکا کے صدر کا حلف اٹھا لیا صبح سے شام تک واشنگٹن ڈی سی میں کیا ہوتا رہا جانیے اس رپورٹ میں۔

ڈونلڈ ٹرمپ نے دوسری بار امریکا کے صدر کا حلف اٹھا لیا۔ وہ ملک کے 47 ویں اور تاریخ کے عمر رسیدہ صدر بن گئے ہیں۔ ان کی حلف برداری کی تقریب کے دن صبح سے شام تک انتہائی مصروف دن رہا اور واشنگٹن ڈی سی میں ہلچل رہی۔

ڈونلڈ ٹرمپ حلف اٹھانے سے قبل صبح سویرے اپنی اہلیہ میلانیا کے ہمراہ چرچ گئے اور وہاں سے وائٹ ہاؤس پہنچے جہاں سبکدوش ہونے والے صدر بائیڈن نے انہیں چائے پر مدعو کیا تھا۔

اس پرتکلف چائے کی دعوت کے بعد ٹرمپ اور بائیڈن وائٹ ہاؤس سے ایک ہی کار میں کیپٹل ہل پہنچے جہاں پر ٹرمپ سے چیف جسٹس سپریم کورٹ نے حلف لیا۔

اس موقع پر انہیں توپوں کی سلامی پیش کی گئی جب کہ ٹرمپ نے حلف اٹھاتے ہی اپنے خطاب میں سابق صدر جو بائیڈن کی انتظامیہ کو آڑے ہاتھوں لیا۔

حلف لینے کے بعد ٹرمپ کیپٹل ون ایرینا پہنچے، جہاں ان کے اعزاز میں رنگا رنگ پریڈ منعقد ہوئی۔ تقریب میں معروف گلوکاروں اور فنکاروں نے عمدہ پرفارمنس کا مطاہرہ کیا۔

تقریب کے دوران پولیس سمیت مختلف اداروں کے دستوں نے سلامی دی۔ اس پریڈ میں ٹرمپ کے ہزاروں حامی بھی شریک ہوئے، جن کی موجودگی میں صدر ٹرمپ نے ایگزکیٹو آرڈر بھی جاری کیے۔

اس کے بعد صدر ٹرمپ اور خاتون اول کیپٹل ون ارینا سے وائٹ ہاؤس پہنچے، جہاں پر نئی انتظامیہ کے لیے ڈنر اور میوزیکل پروگرام کا انعقاد کیا گیا تھا۔

ڈونلڈ ٹرمپ نے امریکی صدر کے عہدے کا حلف اٹھا لیا