کیپ ٹاﺅن : جنوبی افریقہ کے اسٹار بالر ڈیل اسٹین نے ٹیسٹ کرکٹ سے ریٹائرمنٹ کا اعلان کردیا، اسٹین نے ترانوے ٹیسٹ میں جنوبی افریقہ کے لیے سب سے زیادہ چار سوانتالیس وکٹیں حاصل کیں۔
تفصیلات کے مطابق ٹیسٹ کرکٹ میں جنوبی افریقہ کی جانب سے سب سے زیادہ وکٹیں حاصل کرنے والے ڈیل سٹین نے ٹیسٹ کرکٹ سے ریٹائرمنٹ کا اعلان کردیا تاہم اسٹین ون ڈے اور ٹی ٹوئنٹی کیلئے جنوبی افریقہ ٹیم کو دستیاب ہوں گے۔
پندرہ سال تک طویل فارمیٹ میں تباہ کن بولنگ کرنے والے اسٹین نے ترانوے ٹیسٹ میں جنوبی افریقہ کے لیے سب سے زیادہ چار سوانتالیس وکٹیں حاصل کیں۔ 36 سالہ فاسٹ باﺅلر ڈیل اسٹین کندھے کی انجری کے باعث ورلڈ کپ میں شریک نہیں ہوپائے تھے۔
جنوبی افریقہ کے فاسٹ بولر ڈیل اسٹین نے 2004 میں انگلینڈ کے خلاف ڈیبیو کیا تھا، ڈیل اسٹین نے ٹیسٹ کرکٹ سے ریٹائرمنٹ کا اعلان کرتے ہوئے کہا ہے کہ یہ سوچنا کہ آئندہ ٹیسٹ کرکٹ نہیں کھیلنی بہت ہی خوفناک ہے لیکن کرکٹ ہی نہ کھیل پانا اس سے بھی زیادہ خوفناک ہے۔
انہوں نے کہا کہ آج میں کھیل کے اس فارمیٹ سے ریٹائر ہور ہا ہوں جسے میں بہت زیادہ پسند کرتا ہوں، میرے خیال میں ٹیسٹ کرکٹ اس کھیل کا سب سے بہترین ورژن ہے کیونکہ اس میں آپ کا ذہنی ، جسمانی اور جذباتی امتحان ہوتا ہے۔
واضح رہے کہ ڈیل اسٹین نے صرف ٹیسٹ کرکٹ سے ریٹائرمنٹ لی ہے تاہم وہ ون ڈے اور ٹی ٹوئنٹی کرکٹ کھیلتے رہیں گے۔